Актывістка з Дэлі стала новым сімвалам супраціву ў Індыі

• 12.10.2026, 2:33

Нэха Бора заклікала прыхільнікаў не спыняць пратэсты нават пасля затрымання.

29-гадовая Нэха Бора, дактарантка і лідарка студэнцкага руху, стала адной з самых прыкметных фігур пратэстаў, якія кінулі сур'ёзны выклік ураду прэм'ера Нарэндры Модзі за апошнія гады, паведамляе агенцтва Reuters (пераклад — сайт Charter97.org).

На гэтым тыдні яна далучылася да дэманстрацый супраць меркаваных парушэнняў пры фармаванні выбарчых спісаў, а ў суботу яе затрымала паліцыя.

Калі праваахоўнікі перакрылі пратэстоўцам дарогу да традыцыйнага месца дэманстрацый Джантар-Мантар у Нью-Дэлі, Бора заклікала сабрацца на другім канцы горада, на рамесным рынку Дылі-Хаат.

«Сёння Дылі-Хаат становіцца Джантар-Мантарам», — напісала яна ў сацыяльнай сетцы X. Пазней, ужо знаходзячыся пад вартай, актывістка заклікала прыхільнікаў не спыняць пратэсты.

«Я затрыманая. Але рух — не», — заявіла Бора ў апублікаваным у інтэрнэце відэа. У той жа дзень яе вызвалілі.

Пратэсты арганізавала моладзевая партыя «Тараканаў». Удзельнікі патрабуюць адстаўкі кіраўніка выбарчай камісіі Г'янеша Кумара. Яны сцвярджаюць, што выбарчыя спісы страцілі 130 мільёнаў імёнаў. Камісія адмаўляе абвінавачанні ў прадузятасці, а правячая партыя Модзі лічыць крытыку спробай падарваць давер да выбараў.

Шлях Боры ў палітыку пачаўся не з партыйнай барацьбы, а з тэатра. Падчас вучобы ва Універсітэце Дэлі яна ўдзельнічала ў тэатральнай трупе, а затым зацікавілася студэнцкімі пратэстамі супраць закона аб грамадзянстве, прынятага ў 2019 годзе.

Пазней актывістка выступала супраць уцечак экзаменацыйных заданняў, беспрацоўя і дзеянняў паліцыі.