У Беларусі зменяць ліміт грашовых падарункаў без падаходнага падатку

• 13.10.2026, 11:42

Якія сумы можна будзе атрымаць без падаходнага падатку.

Па законе беларусы ў 2026 годзе маглі атрымаць у выглядзе падарунка ад сяброў, знаёмых або дальніх сваякоў унутры краіны 6 тыс. рублёў без сплаты падаходнага падатку. Яшчэ столькі ж можна атрымаць і ад замежных сяброў. Згодна з праектам змяненняў у Падатковы кодэкс, у 2027 годзе гэтыя сумы могуць змяніцца, піша выданне Office Life.

Прапануецца павялічыць сумы, не абкладаемыя падаходным падаткам, да 6588 рублёў у год. Павялічыцца ліміт грашовых падарункаў як унутры краіны, так і пры іх атрыманні з-за мяжы.

Як і раней, ліміт распаўсюджваецца на ўсіх адпраўнікоў, а не на кожнага асобна. З сумы перавышэння давядзецца заплаціць падаходны падатак па стаўцы 13%.

Таксама зменіцца сума, якую можна атрымаць у выглядзе матэрыяльнай дапамогі, падарункаў і прызоў ад ІП або арганізацый, дзе чалавек працуе. Цяпер яна складае 3910 рублёў, а будзе — 4293 рублі.

Раней мы расказвалі, як можа вырасці падатак для тых, хто здае кватэры, дамы і дачы, а таксама пра тое, якія стаўкі транспартнага падатку для фізасобаў і кампаній могуць з’явіцца ў наступным годзе.