Навукоўцы выявілі нечаканы эфект ранішняй кавы

• 14.10.2026, 10:08

Настрой можа палепшыцца ўжо ў першыя гадзіны пасля ўжывання напою.

Многіх ранішняя філіжанка кавы не толькі бадзёрыць, але і паднімае настрой. Выявілася, што гэта натуральнае дзеянне кафеіну, сцвярджае пісьменніца Сэммі Карамела у артыкуле для Vice.

Нядаўняе даследаванне, апублікаванае ў часопісе Nature Scientific Reports, паказала, што людзі, якія ўжываюць кафеін, адзначаюць паляпшэнне настрою на працягу першых двух з паловай гадзін пасля філіжанкі кавы. Падобны эфект назіраўся і пасля гарбаты.

«Кафеін дзейнічае, блакуючы адэназінавыя рэцэптары, што можа павышаць актыўнасць дофаміну ў ключавых абласцях мозгу — эфект, які, згодна з даследаваннямі, звязаны з паляпшэннем настрою і павышэннем пільнасці», — распавяла адна з даследчыц, прафесар Ану Рэало.

Аднак зацяты аматар кавы можа адчуваць раздражняльнасць або млявасць пры працяглай адсутнасці кафеіну. Але варта толькі зрабіць першы глыток кавы — і ён зноў адчуе сябе энергічным і пазітыўным. Падобныя сімптомы назіраюцца і ў людзей, якія ўжываюць умераную колькасць кавы.

Шмат хто лічыць, што людзям з трывожнымі засмучэннямі варта пазбягаць кавы і іншых напояў, якія змяшчаюць кафеін, але, паводле даследаванняў, гэта не заўсёды так. Настрой змяняўся ва ўсіх удзельнікаў, уключаючы людзей з сімптомамі дэпрэсіі, трывожнасці і з парушэннямі сну.