У Кітаі малавядомы вулічны спявак выступіў замест спазнелай зоркі

• 14.10.2026, 13:12

Хоў Лан фактычна выратаваў канцэрт.

У канцы верасня ў горадзе Баотоу (Унутраная Манголія, КНР) павінен быў выступіць Хакен Лі — ганконгскі спявак, тэлевядучы і акцёр. З-за моцнага граду самалёт Лі затрымаўся, і арганізатарам канцэрта давялося шукаць рашэнне. У выніку на сцэну выйшаў 33-гадовы кітайскі вулічны спявак Хоў Лан, паведамляе «Нож».

30 тыс. гледачоў ужо стаялі перад сцэнай і чакалі выхаду зоркі. Арганізатары цягнулі час як маглі, хоць разумелі, што Лі прыбудзе няхутка. Тады дырэктар мерапрыемства ўспомніў пра выканаўцу з правінцыі Гуандун: у той вечар музыкант адпачываў у мясцовым рэстаране.

Раней Хоў працаваў мантажнікам сцэны ў канцэртнай кампаніі і ніколі не спяваў на разагрэве ў зорак такога маштабу. На прапанову дырэктара ён згадзіўся прыкладна за хвіліну, выклікаў таксі, а апошні адрэзак шляху праехаў на пракатным ровары.

Хоў Лан не рэпетаваў і выйшаў на сцэну ў звычайным адзенні. Адзінае, што ён паспеў зрабіць, — перадаць гукааператару спіс сваіх песень. У выніку публіка слухала спевака не 30 хвілін, а цэлыя два гадзіны — артыст выступаў без перапынку.

«Я проста спяваў кожную песню ад усяго сэрца», — распавядаў спявак.

На шчасце, публіка цёпла прыняла новага артыста, і амаль ніхто не сышоў са стадыёна ў чаканні хэдлайнера. Хакен Лі дабраўся да Баотоу ужо ўначы і, выйшаўшы на сцэну, дзевяць разоў пакланіўся гледачам у знак выбачэння, затым выканаў шэсць галоўных хітоў. Пасля выступлення Лі моцна абняў Хоў.

«Ганаруся сабой: я выратаваў канцэрт і спяваў разам з Лі», — пісаў Хоў.

Далей падзеі развіваліся імкліва. Усяго за два тыдні колькасць падпісчыкаў Хоў у сацсетках вырасла да 420 тыс., ён паспеў арганізаваць уласны сольны канцэрт у Лючжоу. Музыкант кажа, што адкрыты да музычнага супрацоўніцтва, але не збіраецца ператвараць раптоўную славу ў бясконцую чаргу заробкаў.