У Растове-на-Доне чатыры суткі не могуць патушыць тэрмінал Навашахцінскага НПЗ

• 14.10.2026, 13:22

На кадрах з месца відны палыхаючыя цыстэрны з клубамі чорнага дыму над імі.

У Растове-на-Доне позна ўвечары ў аўторак выбухнуў яшчэ адзін рэзервуар на нафтаналіўным тэрмінале Навашахцінскага нафтаперапрацоўчага завода (НПЗ), які раней атакавалі дроны, паведамляе ўкраінскі маніторынгавы канал Supernova+.

Полымя ахапіла ўжо 8 з 12 ёмістасцяў, пажар не могуць патушыць чатыры суткі, піша Astra. На кадрах з месца відны палыхаючыя цыстэрны з клубамі чорнага дыму над імі. Канал «Ростов главный» паведаміў, што 13 кастрычніка ў 23:50 «нешта ўспыхнула на ўсё неба і згасла на Левым беразе», і суправадзіў публікацыю здымкам выбуху на НПЗ. Агульная ўмяшчальнасць рэзервуарнага парку тэрмінала складае 60 тысяч кубаметраў.

Беспілотнікі атакавалі тэрмінал Навашахцінскага НПЗ (раней — «Юг Руси») у Чыгуначным раёне Растова-на-Доне ў ноч на 10 кастрычніка. Спадарожнікавы сэрвіс NASA FIRMS зафіксаваў узгаранне. Паводле стану на раніцу серады паведамленняў ад уладаў пра тое, што пажар патушаны, не паступала. Тэрмінал, здольны адгружаць 3,5 млн тон прадукцыі ў год, забяспечваў перавалку нафтапрадуктаў на марскія і рачныя танкеры для экспарту і выкарыстоўваўся для паставак паліва расійскай арміі.

Губернатар Растоўскай вобласці Юрый Слюсар заявіў, што ў ноч на 14 кастрычніка рэгіён падвергся масіраванай атацы беспілотнікаў. Паводле яго слоў, было збіта больш за 160 дронаў у Каменску-Шахцінскім і васьмі раёнах. Пра пацярпелых і наступствы на зямлі Слюсар не паведаміў.

Пры гэтым, згодна з распараджэннем прэзідэнта Украіны Уладзіміра Зяленскага, ЗСУ з 11 кастрычніка па просьбе лідара ЗША Дональда Трампа не наносяць удараў па расійскіх НПЗ у межах «энергетычнага перамір'я», выкананне якога Масква дагэтуль не пацвердзіла.