Axios: У Белым доме запэўнілі Украіну, што не датычныя да абмежаванняў Starlink

• 15.10.2026, 7:50

У Вашынгтоне паабяцалі высветліць сітуацыю.

Адміністрацыя прэзідэнта ЗША Дональда Трампа адмаўляе сваю датычнасць да абмежаванняў Starlink ва Украіне. У Вашынгтоне паабяцалі атрымаць тлумачэнні наконт таго, што адбылося, ад SpaceX.

Аб гэтым паведамляе Axios.

У сераду, 14 кастрычніка, бліжэйшыя дарадцы прэзідэнта Украіны Уладзіміра Зяленскага патэлефанавалі калегам у Белы дом. Яны спыталі, ці прымалі рашэнне абмежаваць Starlink і як выправіць сітуацыю. Падобныя званкі ўкраінскі бок зрабіў у ЦРУ і Пентагон.

У Белым доме адказалі, што не кантралююць SpaceX. Паводле аднаго з суразмоўцаў выдання, адміністрацыя Трампа плануе звярнуцца ў кампанію, каб высветліць прычыны збою.

Высокапастаўлены чыноўнік ЗША запэўніў, што ўлады да абмежаванняў не дачынныя. Амерыканскія чыноўнікі тлумачаць сітуацыю тэхнічнай няспраўнасцю.

У той жа час уладальнік SpaceX Ілан Маск напярэдадні заявіў адваротнае. Паводле яго слоў, Starshield належыць ураду ЗША, а ліміты хуткасці для яго ўсталёўваюць амерыканскія вайскоўцы і ўрэшце прэзідэнт.

Нагадаем, у ноч на 14 кастрычніка тэрміналы Starshield на ўкраінскіх дронах пачалі трымаць сувязь толькі да 160 км/г, а часам сігнал знікаў нават пры 80 км/г. Пазней працу часткова наладзілі, але мяжа ў 160 км/г засталася. Паводле звестак Мінабароны, гэтага недастаткова для перахопу рэактыўных «шахедаў».

У той жа дзень Расія скарысталася праблемамі сувязі і здзейсніла адну з самых маштабных атак на Украіну. Зяленскі звярнуўся да Маска і заклікаў выправіць памылку, якая можа каштаваць жыцця ўкраінцам.