«Белгосстрах» узламалі?

• 22.10.2026, 14:10

Даныя мільёнаў беларусаў пад пагрозай.

У сацсетках распаўсюдзіліся чуткі пра ўзлом базы даных кампаніі «Белгосстрах». Пад удар маглі трапіць персанальныя даныя мільёнаў беларусаў.

«Я купляў КАСКО ў БГС 01.11.2025 і, як мінімум, магчыма, за гэты перыяд да сёння ўсе вашы даныя і мае (пашпарт, месца/адрас рэгістрацыі паводле пашпарта, тэлефоны, імэйлы і г.д.) цяпер у агульным доступе», — напісаў карыстальнік Threads Уладзіслаў.

Ідзецца пра ўцечку даных у тэлеграм-боты, якія выкарыстоўваюцца для пошуку інфармацыі пра людзей. Blizko.by праверыў у адным з такіх даныя журналіста, які звяртаўся ў «Белгосстрах» у жніўні 2026 года, — і мы сапраўды іх выявілі. У звестках пазначаныя пашпартныя даныя, нумар тэлефона і дата звароту ў страхавую.

Ні сам «Белгосстрах», ні Нацыянальны цэнтр абароны персанальных даных пакуль не паведамлялі пра ўзлом. Пры гэтым на сайце кампаніі часова недаступныя асабісты кабінет страхавальніка і афармленне анлайн-заяў на арганізацыю медыцынскай дапамогі па ДМС. Пра аднаўленне працы сэрвісаў абяцаюць паведаміць дадаткова.

У інфармацыйна-даведкавым цэнтры «Белгосстрах» выданню Times.by заявілі, што паведамленні пра ўзлом — непацверджаная інфармацыя. Акрамя таго, там дадалі: у іх няма ніякіх звестак пра ўцечку даных кліентаў.

Дакладная колькасць кліентаў «Белгосстрах» невядомая, але ў ліпені кампанія паведамляла пра 6 мільёнаў дзеючых дамоваў. Такім чынам, ад патэнцыйнай уцечкі могуць пацярпець мільёны беларусаў.