Беларуска — расіянам: З'яжджайце, калі не паважаеце нашу краіну

• 22.10.2026, 16:56

Турысты з РФ нахамілі працоўнікам кафэ і абражалі беларусаў.

Мінчанка распавяла ў сацсетцы Threads пра паводзіны расіян, якіх яна сустрэла ў «Мак.бай».

«Расіяне, калі не паважаеце Беларусь, дык з'яжджайце назад, — піша яна. — Я прыехала ў Беларусь на тыдзень, ехала дадому, вырашыла заехаць у «Мак.бай». Перада мной была група маладых расіян 20–25 гадоў. Мала таго, што яны нахамілі касірцы, дык яшчэ і пачалі абражаць Беларусь.

Мы да ўсіх добра ставімся і ўсім рады, але толькі ў тым выпадку: калі вы паважаеце нашу краіну.

Я сама беларуска, пражыла больш часу ў Беларусі, проста пераехала тры гады таму. І дзе б я ні жыла, для мяне мая родная мова і мая родная краіна — найвышэй за ўсё. Калі вы дазваляеце сабе такія выказванні, вы забываеце, што вы не на сваёй радзіме і не маеце на іх ніякага права. Вы можаце так выказвацца на сваёй радзіме, але праяўляць тут такую непавагу — нізка».

Іншая беларуска, як заўважыў сайт Charter97.org, прывяла яшчэ адзін нядаўні прыклад хамскага стаўлення расіян да нашай краіны і мовы.

«Дзяўчына прыехала ў Беларусь і пачала смяяцца з беларускай мовы, з таго, як гучаць некаторыя словы, — піша яна. — І ў мяне толькі адно пытанне: людзі, вы сур'ёзна? Што тут смешнага?

Чаму, калі чалавек чуе іншую мову, якая адрозніваецца ад яго роднай, у яго ўзнікае жаданне смяяцца і высмейваць яе? Гэта ж чужая культура, гісторыя і частка ідэнтычнасці людзей. Тое, што нейкія словы гучаць нязвыкла для вас, не робіць іх смешнымі або недарэчнымі».