Два гарады Беларусі звяжа трамвай

• 22.10.2026, 17:17

Гэта ўнікальны выпадак для краіны.

Наваполацк можа атрымаць тое, чаго ў Беларусі яшчэ не было: трамвайную лінію, якая злучыць два гарады. Ідзе гаворка пра падаўжэнне шляхоў да Полацка. Пра гэта паведаміў начальнік упраўлення аўтамабільнага і гарадскога пасажырскага транспарту Мінтранса Андрэй Гладкі.

Як піша БелТА, праект уключылі ў дзяржаўную праграму «Транспарт Беларусі» на 2026–2030 гады. Цяпер шукаюць грошы: акрамя мясцовага бюджэту разлічваюць прыцягнуць крэдыты і сродкі рэспубліканскага бюджэту.

Першы этап прадугледжвае будаўніцтва ўчастка даўжынёй каля 3,7 км ад вуліцы Камсамольскай да пасёлка «Паліміраўскі». У больш далёкай перспектыве плануюць давесці шлях да Полацка. Калі задум удасца, трамвай ператворыцца з гарадскога ў міжгародні, і для краіны гэта будзе ўнікальны выпадак.

«Спадзяёмся, што ў 2027 годзе праект атрымае развіццё, і жыхары Наваполацка, а ў перспектыве і Полацка, атрымаюць яшчэ адзін зручны від транспарту», — сказаў Гладкі.

Зараз у Наваполацку дзейнічае адна трамвайная лінія з двума маршрутамі. Яны злучаюць жылыя раёны з прамысловай зонай, то бок трамвай найперш перавозіць работнікаў заводаў. З пашырэннем сеткі ён стане зручнейшым і для звычайных пасажыраў.