Bloomberg: «Раснафта» наўмысна зацягвае рамонт НПЗ
- 22.10.2026, 19:57
Пастаянна іх аднаўляць занадта дорага.
Найбуйнейшая нафтавая кампанія Расіі «Раснафта» наўмысна зацягвае рамонт некаторых сваіх нафтаперапрацоўчых заводаў, падаўжаючы яго тэрміны з некалькіх дзён да тыдняў.
«Раснафта» наўмысна зацягвае рамонт некаторых сваіх нафтаперапрацоўчых заводаў, расцягваючы яго з некалькіх дзён да тыдняў. Прычына ў тым, што ўкраінскія беспілотнікі часта наносяць паўторныя ўдары па прадпрыемствах адразу пасля завяршэння рамонтных работ, а выдаткі на пастаяннае аднаўленне ў кампаніі неафіцыйна называюць непад'ёмнымі, піша Bloomberg са спасылкай на дасведчаныя крыніцы і ўнутраныя ацэнкі шкоды.
Рамонт таксама ўскладняецца дэфіцытам запасных частак. Найцяжэй аднаўляць устаноўкі другаснай перапрацоўкі нафты, дэталі для якіх раней закупляліся на Захадзе. З-за санкцый «Раснафта» цяпер вымушаная спадзявацца на расійскія аналагі і кітайскі імпарт: паставак даводзіцца чакаць месяцамі, да таго ж яны не заўсёды сумяшчальныя з наяўным абсталяваннем.
Абароніць заводы ад рояў беспілотнікаў з дапамогай кантэйнераў, сетак і сталёвых тросаў, паводле звестак Bloomberg, не ўдалося.
«Раснафта» валодае 12 НПЗ, на якія прыпадае каля траціны перапрацоўчых магутнасцяў Расіі. Некаторыя з іх надоўга выйшлі са строю. Туапсінскі завод прастойвае з красавіка, а Рязанскі — адзін з найбуйнейшых, што забяспечваюць палівам Маскву і вобласць, — пасля першай атакі ў маі не працаваў больш за палову часу.
Сызранскі НПЗ апошнія паўгода пераважна або прастойваў, або працаваў менш як на траціну магутнасці.
Гэтыя ўдары ўжо адбіваюцца на фінансах кампаніі. У першай палове года чысты прыбытак «Раснафты» скараціўся амаль на пятую частку — да 200 млрд рублёў, а даўгавая нагрузка дасягнула максімуму больш як за пяць гадоў.
Кіраўніцтва кампаніі, паводле звестак крыніц, баіцца, што яшчэ некалькі месяцаў атак нанесуць бізнесу доўгатэрміновую шкоду. У самой «Раснафце» запэўнілі выданне, што прымаюць меры па абароне заводаў і што ніводная з яе АЗС не закрылася.
З пачатку года ўкраінскія беспілотнікі атакавалі расійскія НПЗ не менш як 114 разоў (паводле падлікаў Bloomberg) — гэта ўдвая больш, чым за аналагічны перыяд мінулага года. У верасні Міжнароднае энергетычнае агенцтва панізіла прагноз па перапрацоўцы нафты ў Расіі на бліжэйшыя 18 месяцаў прыблізна да 4 млн барэляў у суткі, што амаль на 30% менш, чым паказчыкі, якія папярэднічалі паўнамаштабнаму ўварванню.