У расіян рэзка выраслі страты ў Данецкай вобласці

• 23.10.2026, 8:44

Стала вядома прычына.

У апошнія тыдні на фронце расійска-ўкраінскай вайны рэзка павялічылася колькасць ліквідаваных акупантаў. У асобныя дні паказчыкі дасягалі 2000 чалавек. Гэтыя даныя пацвярджае і тлумачыць французскі OSINT-аналітык Клеман Молен.

Паводле яго ацэнкі, прычынай можа быць нарошчванне расійскіх штурмаў на Добрапілле ў Данецкай вобласці. Молен падкрэслівае, што афіцыйныя ўкраінскія даныя пра страты праціўніка не варта лічыць цалкам дакладнымі.

Аднак, паводле яго слоў, важныя агульныя тэндэнцыі: статыстыка Генеральнага штаба ЗСУ за 2022–2024 гады была блізкая да падлікаў Mediazona, скарэктаваных з улікам суадносінаў забітых і параненых.

Аналітык таксама звярнуў увагу на даныя Сіл беспілотных сістэм Украіны. Паводле іх інфармацыі, толькі ў кастрычніку дроны паразілі 11 800 расійскіх вайскоўцаў — больш, чым за ўвесь жнівень, хоць на момант публікацыі прайшло толькі 22 дні месяца.

Такую дынаміку аналітык звязвае з фанатычнымі спробамі акупантаў захапіць Добрапілле. Расійскае камандаванне накіроўвае туды сотні вайскоўцаў штодня і задзейнічае рэзервы чатырох армій, імкнучыся дасягнуць прасоўвання да надыходу зімы.

Молен лічыць, што РФ спрабуе любой цаной перанесці баявыя дзеянні на гэтым напрамку ў гарадскую забудову, нягледзячы на рэкордныя страты. Паводле яго ацэнкі, страты на гэтым напрамку могуць пераўзыходзіць нават сітуацыю ў Бахмуце ў 2023 годзе.