У Румыніі ліквідавалі дыверсійную сетку расійскіх спецслужбаў

• 27.10.2026, 8:07

Перад шпіёнамі былі пастаўленыя маштабныя задачы.

У Румыніі праваахоўнікі выявілі і ліквідавалі дыверсійную сетку, каардынаваную расійскімі спецслужбамі.

Яна датычная да пажару ў Брашове каля завода абароннага канцэрна Romarm, піша румынскае выданне Adevarul.

Пажар каля завода Romarm у Брашове адбыўся ў ноч на 14 верасня бягучага года. На шчасце, ніхто з людзей тады не пацярпеў.

Упраўленне па расследаванні арганізаванай злачыннасці і тэрарызму ў Румыніі (DIICOT) падазрае ў падпале двух грамадзян Беларусі і грамадзяніна Украіны. Грамадзян Беларусі затрымалі ў Германіі, а ўкраінец знаходзіцца ў Польшчы, але хутка яго могуць даставіць у Румынію, бо ордэр на арышт ужо выдадзены.

Рэзідэнтура, якую расійскія спецслужбы стварылі ў Румыніі, павінна была дзейнічаць у розных краінах Усходняй Еўропы.

Перад ёй паставілі амбіцыйныя задачы, напрыклад, дыверсанты павінны былі зрываць падрыхтоўку ўкраінскіх салдат і афіцэраў.