Гомельскія чыноўнікі асвоілі метад Тома Соера
- 28.10.2026, 17:19
Людзям прапануюць даплаціць за магчымасць самім заняцца добраўпарадкаваннем.
На Гомельшчыне чыноўнікі пашыраюць практыку выкарыстання бясплатнай працоўнай сілы. Але калі раней ініцыятывы былі добраахвотна-прымусовымі, як пазапланавыя суботнікі або перакладка пліткі ля школ сіламі настаўнікаў, то цяпер пайшла ў ход методыка Тома Соера.
«Флагшток» распавёў пра конкурс грамадзянскіх ініцыятыў «Досвед старэйшых — энергія маладых». Яго распрацавала абласная асацыяцыя мясцовых саветаў дэпутатаў — паводле слоў кіраўніцы Гомельскага гарсавета дэпутатаў Вікторыі Ладуцька, праект накіраваны на «развіццё дэпутацкіх сувязяў і развіццё самакіравання».
Цікава, што гэта ўжо другі, дадатковы конкурс. Першы адбыўся яшчэ на пачатку года. На яго было пададзена 120 заявак (у мінулым годзе — 55), падтрымку атрымалі 33 праекты.
Ініцыятыўныя жыхары Гомельскай вобласці падалі на конкурс свае экалагічныя ідэі, праекты абнаўлення зон масавага адпачынку, спартыўных пляцовак.
Праўда, ёсць сярод прапаноў і «пытанні захавання гістарычнай памяці», «патрыятычных і духоўна-маральных каштоўнасцяў», павышэння турыстычнай прывабнасці аб’ектаў. Пераможцам даюць магчымасць самім рэалізаваць ідэю: пафарбаваць лаўкі, упарадкаваць мемарыял ВАВ, прывесці да ладу дзіцячую пляцоўку і г.д.
Дэпутаты і спецыялісты аблвыканкама ацанілі кожную ініцыятыву па 10-бальнай шкале, улічваючы сацыяльную значнасць і навізну ідэі, каштарыс і ўзровень суфінансавання. Гэтым разам абяруць трох пераможцаў, іх абвесцяць 5 лістапада на форуме грамадзянскіх ініцыятыў у Гомелі.
Цікавы момант: удзельнікі, прапануючы, напрыклад, абнавіць лаўкі або прывесці да ладу дзіцячую пляцоўку, паводле ўмоў павінны кампенсаваць не менш як 10% кошту работ — «даказваючы матывацыю і гатоўнасць уласнымі рукамі берагчы і развіваць свой край». Гэта падаецца як пераход жыхароў ад спажывецкіх адносін да жыцця да гатоўнасці ўкласціся самім у паляпшэнне малой радзімы.
Пры гэтым ідзе гаворка пра тыя самыя пытанні лакальнага значэння, якія наогул мясцовыя ўлады павінны выконваць і без усялякіх конкурсаў, за кошт бюджэту (то бок, падаткаў саміх грамадзян).
Як тут не згадаць геніяльную прыдумку Тома Соера, які ператварыў сумную і абавязковую фарбоўку плота ў захапляльны аўкцыён — і замест яго працу зрабілі іншыя, ды яшчэ і заплацілі за гэта.