Гары Каспараў: Сітуацыя цалкам ясная

• 28.10.2026, 17:22

Апазіцыянер папярэдзіў еўрапейцаў.

Адзін з лідараў расійскай апазіцыі, экс-чэмпіён свету па шахматах Гары Каспараў заявіў, што без тэрміновага нарашчэння ваеннай і фінансавай дапамогі Еўропа рызыкуе сутыкнуцца з катастрафічнымі наступствамі. У калонцы для The Telegraph ён папярэдзіў: Украіну чакае надзвычай цяжкая зіма, а без неабходнага фінансавання і ўзбраення краіна можа пацярпець паразу.

«На пятым годзе вайны Украіну чакае надзвычай цяжкая зіма. Сітуацыя цалкам ясная: калі Украіна неадкладна не атрымае ад Еўропы неабходнага фінансавання і ўзбраення, яна прайграе», — напісаў Каспараў.

На яго думку, у выпадку паразы Украіны ўмовы далейшага развіцця падзей будзе дыктаваць Уладзімір Пуцін. Тады, лічыць апазіцыянер, Еўропа сама можа сутыкнуцца з прамой расійскай агрэсіяй і апынецца няздольнай гарантаваць бяспеку сваім грамадзянам.

Перш за ўсё Каспараў прапанаваў размарозіць расійскія дзяржаўныя актывы, што захоўваюцца ў Бельгіі, і накіраваць гэтыя сродкі на ўзбраенне і падтрымку Украіны. Маруджанне, папярэдзіў ён, можа прывесці да значна цяжэйшых наступстваў, чым прынята лічыць у Еўропе.