Нямецкая брыгада будзе адсочваць вайсковую актыўнасць Беларусі і РФ

• 28.10.2026, 19:58

Брыгада Бундэсвера будзе размешчана ў Літве.

Пастаянная брыгада Бундэсвера ў Літве будзе выкарыстоўваць сродкі радыёэлектроннай барацьбы для ранняга папярэджання пра вайсковую актыўнасць у Калінінградскай вобласці РФ і Беларусі.

Пра гэта агенцтву Reuters паведаміў камандуючы кібер- і інфармацыйным падраздзяленнем узброеных сіл Германіі, віцэ-адмірал Томас Даум.

Нямецкая брыгада, поўнае разгортванне якой запланавана на наступны год, таксама будзе збіраць даныя пра расійскія і беларускія вайсковыя перадатчыкі і радыёлакацыйныя сістэмы для абнаўлення базаў даных радыёэлектроннай барацьбы, якіямі карыстаюцца войскі Германіі і саюзнікаў.

«Мы ўнясём (даныя) ў базы даных радыёэлектроннай барацьбы, якія затым папярэдзяць усе нашы сістэмы, калі на беларускім баку з'явіцца новы радар», — паведаміў Даум.

Ён адзначыў, што дзейнасць Расіі ў некаторых рэгіёнах Еўропы дасягнула таго, што ён назваў «другой фазай, мэта якой — нанесці шкоду», але якая не дасягае парога ўзброенага канфлікту.

«У кіберінфармацыйнай сферы пакуль не ідзе вайна, але гэта ўжо не мір», — адзначыў кіраўнік ваеннага кібераддзела Бундэсвера.

Нямецкая армія цяпер выпрабоўвае ў Літве сістэмы радыёэлектроннай барацьбы, у прыватнасці сродкі выяўлення дронаў, перахопнікі сігналаў, глушылкі і датчыкі, прызначаныя для перадачы даных з поля бою аналітыкам.

«Да вайны ва Украіне нямецкім вайскоўцам з цяжкасцю ўдавалася пераканаць камерцыйныя кампаніі пастаўляць ім такія сістэмы», — адзначыў Патрык Ешке, які ўзначальвае цэнтр кіберінавацый Бундэсвера.

Паводле яго слоў, задача змянілася: цяпер трэба не проста знайсці пастаўшчыкоў, а адабраць найбольш перспектыўныя тэхналогіі з мноства прапаноў.

«На працягу апошніх дзесяцігоддзяў мы не ўкладвалі занадта шмат сродкаў у новыя магчымасці. Мы выкарыстоўвалі тое, што мелі, бо засяроджваліся на місіях за мяжой — у Афганістане і іншых мясцінах. Цяпер ёсць неабходнасць палепшыць нашы магчымасці», — сказаў Даум.