Пуцін раптам вырашыў перанесці заводы расійскіх кампаній у Афрыку

• 29.10.2026, 16:26

Санкцыі даюць пра сябе ведаць.

Расія гатовая перанесці частку прамысловых прадпрыемстваў у краіны Афрыкі, заявіў расійскі дыктатар Пуцін, паведамляе The Moscow Times.

«Гэта цалкам адпавядае інтарэсам Расіі, асабліва ў сённяшніх умовах, калі ў дачыненні да расійскай эканомікі і прадпрыемстваў ужываюцца шматлікія санкцыі», — сказаў Пуцін на форуме «Расія — Афрыка». Паводле яго слоў, інвестыцыйны патэнцыял расійскіх кампаній «дастаткова высокі», і «тут ёсць над чым папрацаваць». Пры гэтым ён адзначыў, што ўкладанні ў афрыканскія краіны павінны быць «надзейнымі і абароненымі», каб вытворчасці працавалі «незалежна ад знешнепалітычнай кан’юнктуры».

Так Пуцін адказаў прэзідэнту Бурундзі Эварысту Ндайішыміе, які заявіў, што «Афрыка не будзе задавольвацца экспартам сыравіны і імпартам гатовай прадукцыі». «Мы павінны развіваць уласны прамысловы патэнцыял, мадэрнізаваць нашую сельскую гаспадарку, умацоўваць нашу энергетычную інфраструктуру, лагістычныя маршруты і больш інвеставаць у даследчую дзейнасць і развіццё тэхналогій», — сказаў Ндайішыміе. Ён падкрэсліў, што Афрыка павінна стаць «сапраўдным рынкам вытворчасці і збыту, а не заставацца рынкам спажывання».

Напярэдадні Пуцін заявіў, што Расія дасягнула «ўражлівых вынікаў» у развіцці высокіх тэхналогій і гатовая перадаць «ноу-хау» сваім «афрыканскім сябрам». «Канкурэнтам даводзіцца нас даганяць па некаторых напрамках і капіяваць нашы распрацоўкі», — падкрэсліў Пуцін, выступаючы перад 22 кіраўнікамі афрыканскіх дзяржаў, у тым ліку Эфіопіі, Зімбабвэ і Малі.

Раней міністр эканамічнага развіцця РФ Максім Рэшэтнікаў заявіў, што расійскія кампаніі гатовыя ў межах прамысловай кааперацыі выпускаць прадукцыю ў афрыканскіх краінах. «Галоўны пасыл, з якім мы звяртаемся да Афрыкі, — давайце разам забяспечваць суверэннае развіццё», — сказаў Рэшэтнікаў. Ён прапанаваў супрацоўніцтва ў сферы фармацэўтыкі і ІТ-рашэнняў. У сваю чаргу кіраўнік Мінпрамторгу РФ Антон Аліханаў паведаміў пра гатоўнасць разам з Афрыкай развіваць аўтамабілебудаванне.

Дзяржаўная карпарацыя «Расатам» выступіла з прапановай будаваць плывучыя АЭС у прыбярэжных афрыканскіх краінах. «У якасці стартовага кроку такая крыніца, як плывучы атамны энергаблок, можа быць добрай кропкай уваходу для таго, каб адначасова і вырашыць свае задачы, і ўвайсці ў атамны клуб», — сказаў прадстаўнік дзяржаўнай карпарацыі.

Найбуйнейшы вытворца звадкаванага прыроднага газу (СПГ) у Расіі «Новатэк» прапанаваў краінам Афрыкі ўласную тэхналогію вытворчасці, апрабаваную на арктычных праектах, а алюмініевы гігант «Русал» падпісаў мемарандум з Ганай аб стварэнні ў рэспубліцы сумеснага прадпрыемства па здабычы і перапрацоўцы баксітаў — сыравіны для алюмінію.

Да гэтага кіраўнік Мінэнерга РФ Сяргей Цівілёў заявіў, што Расія гатовая весці геалагаразведку ў Афрыцы, займацца здабычай газу, калі будуць выяўлены радовішчы, мадэрнізаваць ГЭС, а таксама будаваць сонечныя і цеплавыя станцыі.

Саміт «Расія — Афрыка» праходзіць у Маскве 28–29 верасня. У ім бяруць удзел 48 з 54 афрыканскіх краін.