Рынак жылля ў Мінску пачаў здаваць абароты
- 29.10.2026, 18:04
Рэзкі рост цэн прымусіў пакупнікоў адкласці здзелкі.
Рынак жылля сталіцы ў III квартале 2026 года захоўваў высокую актыўнасць, але цэны працягвалі расці. Аднак у кастрычніку з’явіліся і першыя прыкметы астуджэння попыту — пакупнікі пачалі рэагаваць на дарагоўлю, піша «Точка».
Попыт на «другаску» ўпалі, але не цэны
На другасным рынку «квадрат» за квартал дадаў 10–12% у рублях і 4–6% у доларах. Сярэдняя цана склалася такой: у аднапакаёвых кватэрах — 7470 рублёў ($2520), двухпакаёвых — 6640 рублёў ($2240), трохпакаёвых — 6050 рублёў ($2040).
Як ні дзіўна, самым дарагім апынуўся квадратны метр менавіта ў «аднушках» — пакупнікі часцей выбіраюць жыллё з меншай агульнай вартасцю, таму попыт разганяе цану.
Разрыў паміж ніжнім і верхнім цэнавымі сегментамі дасягнуў $1260 за «квадрат». Пры гэтым з пачатку 2025 года цэны ў дарагім сегменце выраслі на 41%.
А вось прапанова прыкметна скарацілася: за год колькасць аб’ектаў упала з 6800 да 4500. Асабліва моцна праселі тыповае жыллё і жыллё ў панэльных дамах. Здзелкі з кватэрамі ў дамах да 1960 года пабудовы ўпалі на 23%, у дамах 1960–1970-х і 1970–1980-х — на 10%.
Новабудоўлі таксама не адстаюць
У новабудоўлях сярэдняя цана «квадрата» дасягнула 7220 рублёў — на 13% больш, чым у II квартале. У доларах падаражанне — да $2420 (+7%).
Найбольш запатрабаваны дыяпазон — 250–350 тыс. рублёў: на яго прыпала 45% продажаў. Праўда, першасны рынак забяспечыў толькі 9% усіх здзелак.
Сярод раёнаў па колькасці здзелак лідзіраваў Кастрычніцкі з яго неабдымным ЖК «Мінск Мір» — 732 продажы.
Найменшую актыўнасць зафіксавалі ў Партызанскім раёне — 126 здзелак.
Найбольш дарагая купля
Кватэра плошчай 168 м2 на вуліцы Грыбаедава, 21, абышлася пакупніку ў 3,47 млн рублёў (каля $1,2 млн) і стала самай буйной пакупкай квартала.
Усяго ж за ліпень — верасень у сталіцы прадалі 23 кватэры даражэй за 1 млн рублёў — на 10 больш, чым у II квартале.
Кастрычнік прынёс астуджэнне
А цяпер да добрых навін для пакупнікоў: за першыя 20 дзён кастрычніка зарэгістравалі менш за 500 здзелак — каля 40% вераснёўскага аб’ёму. У Дзяржкаммаёмасці гэта звязваюць з першымі прыкметамі астуджэння попыту на фоне высокіх цэн.
Падтрымаць рынак могуць паляпшэнне ўмоў іпатэкі і рост даходаў, але скарачэнне прапановы тыповага жылля і дарагія кватэры могуць прывесці яго да стабілізацыі.