Зорка серыяла «Гульня тронаў» прыехала ў Кіеў

• 29.10.2026, 19:17

Уначы акцёру давялося хавацца ад расійскай атакі ў метро.

Дацкі акцёр Нікалас Костэр-Вальдаў, вядомы па ролі Джэйме Ланістэра ў амерыканскім серыяле «Гульня тронаў», прыехаў у Кіеў. Падрабязнасці яго візіту распавяло «Суспільне».

Паводле слоў акцёра, ён прыехаў ва Украіну з уласнай ініцыятывы, каб прыцягнуць увагу грамадскасці да таго, што краіна-агрэсар РФ працягвае весці поўнамаштабную вайну супраць Украіны.

«Вайна цягнецца ўжо так доўга, што, магчыма, пра яе лёгка забыць, а ў Еўропе надыходзіць пэўная стома, што з'яўляецца натуральнай з'явай, — такое здараецца, гэта заўсёды здараецца. І я лічу, што вельмі важна працягваць распавядаць гэтую гісторыю, таму што гэта вельмі важная гісторыя, таму я тут», — сказаў Костэр-Вальдаў.

Акцёра таксама бачылі на адной са станцый кіеўскага метро, дзе ён хаваўся ўначы падчас чарговай атакі краіны-агрэсара РФ на Украіну. Пра гэта паведаміла агенцтва Reuters.