У Лондане сям'я знайшла пад канапай талерку дынастыі Цін за £30 тысяч

• 5.10.2026, 19:16

Яно захавалася практычна ў першазданным стане.

У Лондане сям'я знайшла пад канапай гіганцкую фарфоравую талерку дынастыі Цін, вырабленую для Забароненага горада ў Пекіне. Пра гэта паведамляе Daily Mail.

Рэдкая імператарская рэліквія, вырабленая ў гонар дня нараджэння ўдавы-імператрыцы Кітая Цысі ў 1880-я гады, была прывезеная ў Вялікабрытанію кітайскім імігрантам Він Лунг Гу на пачатку XX стагоддзя і перадавалася з пакалення ў пакаленне ў яго сям'і.

Талерка шырынёй 60 см і вагой 13 кілаграмаў захоўвалася пад канапай у гасцінай нашчадка спадара Гу. Мужчына звязаўся з аўкцыянерамі і даведаўся, што кошт яго знаходкі — ад £20 тысяч да £30 тысяч.

Спецыяліст па азіяцкім мастацтве аўкцыёна Woolley & Wallis Джон Эксфорд падцвердзіў сапраўднасць талеркі і падкрэсліў, што яна захавалася амаль у першапачатковым выглядзе.

«Выявіць імператарскую талерку такога манументальнага маштабу ў амаль першапачатковым стане і даведацца, што яна захоўвалася пад канапай у гасцінай у Лондане, — гэта сапраўды неверагодна», — сказаў ён.

На талерцы, якую называюць адным з самых значных узораў палацавага фарфору позняй Цін, што з'явіліся на рынку апошнім часам, выяўлены два цмокі, што змагаюцца за палаючую жамчужыну сярод аблокаў і языкоў полымя. Звонку прадмет упрыгожаны каймой з выявай лотаса, слівы, півоні, хрызантэм і гібіскуса, а па краі — яшчэ шасцю цмокамі і палаючымі жамчужынамі.