Расія б'е па мастах асаблівымі боепрыпасамі, але ў іх ёсць адна слабасць

• 6.10.2026, 9:58

Вайсковы эксперт звярнуў увагу на важную дэталь.

Расійскія войскі спрабуюць ужываць супраць мастоў ва Украіне спецыяльныя кумулятыўна-рэжучыя боепрыпасы, здольныя пашкоджваць металічныя канструкцыі, аднак іх эфектыўнае выкарыстанне патрабуе вельмі высокай дакладнасці, і з гэтым у ворага ёсць праблемы. Пра гэта на канале «Кіеў24» распавёў камандзір падраздзялення TERRA ў складзе 3-га армейскага корпуса Мікалай Валахоў.

Ён патлумачыў, што ў расійскіх «Геранях» кумулятыўны струмень фарміруецца ў рэжучую плоскасць, з дапамогай якой, уласна, акупанты і хочуць зрэзаць металічныя канструкцыі.

«Калі вайскоўцы хочуць узарваць мост, то яны не проста кладуць шмат выбухоўкі... Гэта асобная складанасць, таму што тады выбух нібыта «абліжа» канструкцыю, і энергія выбуху ў яе не пранікне. А вось кумулятыўныя боепрыпасы могуць зрабіць так, што энергія выбуху канцэнтравана трапіць у апору ЛЭП або моста», – адзначыў вайсковец.

Аднак, падкрэсліў ён, і гэтага недастаткова. Бо яшчэ важна, каб напрамак гэтай рэжучай струі трапіў проста ў апору.

«І з гэтым у расіян насамрэч вялікія складанасці», – дадаў Валахоў.