Ці стане загадкавая чума ў Сібіры «Чарнобылем» Пуціна?

• 6.10.2026, 15:35

Расійскія ўлады спрабуюць хаваць інфармацыю, як і 40 гадоў таму.

У Расіі разгараецца інфармацыйны скандал вакол загадкавай смерці маладой супрацоўніцы лабараторыі ў Сібіры. Яна працавала з небяспечнымі бактэрыямі ў установе, звязанай з біялагічнай бяспекай і даследаваннямі супраць біятэрарызму, піша Newsweek (пераклад — сайт Charter97.org).

Пасля яе смерці ў бальніцы ўвялі каранцін, а ўлады прынялі незвычайныя меры засцярогі. Гэта нарадзіла чуткі пра магчымы выпадак лёгачнай чумы, хоць афіцыйнага пацверджання ўспышкі інфекцыі пакуль няма.

Сітуацыю ўжо параўноўваюць з Чарнобылем. У 1986 годзе Масква некалькі дзён хавала маштаб аварыі на чацвёртым энергаблоку. Свет даведаўся пра катастрофу толькі пасля таго, як шведскія спецыялісты выявілі радыяцыйнае забруджанне і ўстанавілі, што яно прыйшло з тэрыторыі СССР.

«Ніхто за жалезнай заслонай не ведаў пра катастрофу, бо Масква спрабавала яе схаваць», — піша Newsweek.

Цяпер, праз 40 гадоў, расійскія ўлады зноў спрабуюць схаваць факты. На гэты раз гаворка ідзе не пра ядзерную аварыю, а пра магчымы кантакт з адной з самых небяспечных інфекцый.