У Дзяржынску з кранаў цячэ чорная вада

• 6.10.2026, 16:15

Жыхары скардзяцца на наступствы працаў вадоканала.

У апошнія некалькі дзён жыхары некаторых мікрараёнаў Дзяржынска скардзяцца на пагаршэнне якасці вады.

Высветлілася, што нязручнасці звязаныя з маштабнымі тэхналагічнымі работамі, якія праводзіліся ў Дзяржынску 1 кастрычніка. У гэты дзень спецыялісты вадоканала пераключылі спажыўцоў са старой цэнтральнай сеткі вадаправода на новую. Працы вяліся адначасова ў пяці кропках горада.

— Пры наступным запуску абноўленай сістэмы спатрэбілася адначасова падаць больш за 2000 кубічных метраў вады. Такая значная колькасць справакавала ўзнікненне гідраўдараў — рэзкіх перападаў ціску ў трубаправодах, — растлумачыў Dzh.by галоўны інжынер Анатоль Чайкоўскі. — Гэта, у сваю чаргу, прывяло да натуральнага ўзмучвання донных адкладаў і вымывання шматгадовага асадку з памежных участкаў дзейных сетак. Менавіта гэтыя працэсы і сталі прычынай змянення колеру і празрыстасці вады ў часткі абанентаў.

Паводле яго слоў, цяпер спецыялісты вадоканала ўжо праводзяць тэхналагічную прамыўку закранутых участкаў вадаправода. Гэтыя працы будуць весціся да поўнага аднаўлення нарматыўных паказчыкаў якасці вады.

Да завяршэння прамыўкі на прадпрыемстве настойліва рэкамендуюць жыхарам выкарыстоўваць ваду для піцця толькі пасля адстойвання і кіпячэння.