Францыя запусціла новую балістычную ракету з атамнай падводнай лодкі

• 6.10.2026, 16:40

Відэафакт.

Прэзідэнт Францыі Эмануэль Макрон стаў сведкам выпрабавальнага пуску новай балістычнай ракеты з атамнай падводнай лодкі. Пра гэта ён напісаў у X.

Макрон назіраў за пускам на борце шматмэтавага фрэгата Auvergne. «Я стаў сведкам першага пуску новай балістычнай ракеты M51.3 з атамнай падводнай лодкі-носьбіта Le Vigilant», — паведаміў ён і апублікаваў відэа запуску.

Паводле слоў французскага лідара, падобным досведам валодаюць толькі вельмі нямногія краіны. Ён павіншаваў усіх датычных да «выключнага поспеху»: DGA, CEA, Ariane Group, Naval Group і ВМС Францыі. «Ваш прафесіяналізм, скрупулёзнасць і тэхнічнае майстэрства — гонар Францыі», — заявіў Макрон.

Ён адзначыў, што гэты тэхнічны поспех чарговы раз пацвярджае надзейнасць французскай сістэмы стрымлівання, стабільнасць якой гарантаваная. «Каб быць вольным, трэба выклікаць павагу. А каб выклікаць павагу, трэба быць моцным», — падкрэсліў прэзідэнт.

Макрон таксама распавёў, што будучыя стратэгічныя падводныя лодкі Францыі ўжо будуюцца. Сёлета, паводле яго слоў, запусцілі праграму стварэння стратэгічных гіпергукавых і манеўраных ракет, якімі абсталююць паветраную складовую стрымлівання. «Наша ядравое стрымліванне абараняе нас і будзе абараняць і надалей», — дадаў ён.