Экспарт нафты з Блізкага Усходу вярнуўся да даваеннага ўзроўню
- 6.10.2026, 18:15
Цана ф'ючэрсаў на Brent апусцілася ніжэй за $100 за барэль.
Вываз нафты з краін Персідскага заліва дасягнуў даваеннага ўзроўню дзякуючы дыверсіфікацыі маршрутаў паставак і часткова наладжанаму руху суднаў праз Армузскі праліў. Цана ф'ючэрсаў на Brent апусцілася ніжэй за $100 за барэль, аднак цэны на паліва застаюцца паблізу рэкордных значэнняў. З Блізкага Усходу цяпер вывозіцца пераважна сырая нафта, бо многія мясцовыя НПЗ застаюцца закрытымі з-за пашкоджанняў, выкліканых іранскімі ўдарамі, і захаванай пагрозы атак. Таму нафтапрадуктаў у свеце па-ранейшаму бракуе.
За тыдзень з 21 па 27 верасня з рэгіёна было адпраўлена на экспарт больш за 160 млн барэляў, або 23,3 млн барэляў у суткі, піша The Wall Street Journal са спасылкай на дадзеныя Kpler. Аналагічныя аб'ёмы вывозіліся ў першай палове лютага. Але цяпер каля 55% экспартуецца з Аманскага заліва, які знаходзіцца перад Армузскім пралівам (які ўсё менш паспяхова спрабуе блакаваць Іран), і з Чырвонага мора, куды нафту па нафтаправодзе перапампоўвае Саудаўская Аравія. Да вайны больш за 80% адпраўлялася праз Армуз.
Экспарт з рэгіёна па ўсіх маршрутах на працягу 14 дзён у верасні перавышаў даваенны ўзровень, які цягам года да вайны складаў 18 млн барэляў у суткі, дадае Reuters. Паводле дадзеных Kpler, нядаўні ўсплёск паставак тлумачыцца тым, што Саудаўская Аравія, імкнучыся аднавіць сваю долю рынку, пачала больш актыўна вывозіць нафту танкерамі праз Армуз і больш пампаваць па нафтаправодзе, адноўленым пасля ўдару 10 верасня, які з Ірака нанеслі падтрымліваемыя Іранам баевікі.
Ф'ючэрсы на Brent з першай паловы верасня амаль увесь час трымаліся вышэй за $100 за барэль. Але ў аўторак яны ўпалі да $98,1. Этаму паспрыяла паведамленне пра тое, што падтрымліваемыя саудаўцамі ўрадавыя войскі Емена вярнулі сабе ўзбярэжжа каля праліва Баб-эль-Мандэб, праз які судны ўваходзяць у Чырвонае мора. У выніку групоўка хусітаў, якой дапамагае Іран, была выцесненая з большасці тэрыторый, захопленых ёю ў верасні, адкуль яна магла кантраляваць рух суднаў.
Кіраўнікі амерыканскіх нафтавых кампаній просяць, каб ВМС ЗША, якія абараняюць ад іранскіх абстрэлаў судны, што ідуць праз Армузскі праліў, надавалі больш увагі суправаджэнню танкераў з нафтапрадуктамі, расказалі WSJ удзельнікі галіны. Да гэтага часу ЗША пераважна дапамагалі супертанкерам, здольным перавозіць каля 2 млн барэляў сырай нафты.
Іх апошнім часам актыўна выкарыстоўвае Саудаўская Аравія, паведамілі Reuters трэйдары і аналітыкі. З-за такіх вялікіх аб'ёмаў вывазу магчымасці па перавалцы нафты ў Аманскім заліве на судны, якія потым дастаўляюць яе пакупнікам, дасягнулі мяжы, кажуць яны.
Сырая нафта, якая такім чынам вывозіцца, пераважна паступае ў азіяцкія краіны, што перапрацоўваюць яе для ўласных патрэб і атрыманыя з яе прадукты асабліва не экспартуюць. У выніку ЗША, сусветны лідар у здабычы і перапрацоўцы нафты, застаюцца адным з нямногіх буйных пастаўшчыкоў, здольных забяспечваць свет палівам.
Нават калі ўдасца захаваць цяперашнія аб'ёмы экспарту з Персідскага заліва, чакаць стабілізацыі на сусветным рынку раней за сярэдзіну 2027 года не даводзіцца, лічаць аналітыкі. Краінам рэгіёна спатрэбіцца час на аднаўленне нафтавых радовішчаў і НПЗ, а рынку — на папаўненне сотняў мільёнаў барэляў нафты, выдаткаваных з запасаў у выніку вайны і крызісу.
У ЗША сярэдняя цана галона дызеля ў канцы верасня дасягнула рэкордных $6,53 (супраць $5,6 месяцам раней і $3,7 — годам раней), а ў Каліфорніі, дзе прапанова ніжэй, а падаткі вышэй, — $8,44. Зараз дызель у ЗША каштуе $6,37, і дарагоўля паліва з'яўляецца адным з найважнейшых фактараў, здольных падарваць пазіцыі рэспубліканцаў на выбарах у Кангрэс, якія пройдуць праз месяц.