Трамп і Пуцін абмяркуюць чуму ў Расіі

• 7.10.2026, 7:37

Размова адбудзецца ў бліжэйшы час.

Прэзідэнт ЗША і расійскі дыктатар у бліжэйшы час правядуць тэлефонную размову, каб абмеркаваць магчымы выпадак лёгачнай чумы ў Іркуцкай вобласці.

Пра гэта паведамляе Associated Press.

Паводле слоў амерыканскага прэзідэнта, з Пуціным ён пагаворыць «зусім хутка». На пытанне пра ацэнкі амерыканскай разведкі Трамп адказаў, што ЗША вядуць «занадта глыбокія абмеркаванні» гэтай тэмы.

«Мы зможам паведаміць пра гэта, верагодна, заўтра», - дадаў ён.

Напярэдадні Трамп заявіў, што ЗША гатовыя дапамагчы Расіі, назваўшы чуму «цяжкай хваробай», узбуджальнікі якой сталі мацнейшымі, «як армія».

У Сусветнай арганізацыі аховы здароўя рызыка распаўсюджвання хваробы за межы Расіі была ацэненая як «вельмі нізкая». У арганізацыі паведамілі, што падтрымліваюць сувязь з расійскімі ўладамі.

Афіцыйна ў Расіі смерць супрацоўніцы процічумнага інстытута дагэтуль тлумачаць пнеўманіяй невядомага паходжання.

Выпадак чумы адбыўся на пачатку кастрычніка. У ноч на 2 кастрычніка ў бальніцы Шэлехава памерла 28-гадовая лабарантка Іркуцкага процічумнага інстытута, якая, паводле звестак мясцовых СМІ, за тыдзень да гэтага разбіла прабірку з узбуджальнікам лёгачнай чумы. Каля 200 чалавек, якія з ёй кантактавалі, ізалявалі.

6 кастрычніка пасольства ЗША ў Маскве абнародавала афіцыйнае папярэджанне аб падазрэнні на лёгачную чуму. Амерыканцам нагадалі, што яны павінны неадкладна выехаць з Расіі, а тым, хто нядаўна знаходзіўся ў рэгіёне, параілі сачыць за здароўем на працягу 14 дзён.