ЗША заклікалі амерыканцаў пакінуць Расію з-за чумы

• 7.10.2026, 7:56

Амбасада ў Маскве апублікавала афіцыйнае папярэджанне.

Амбасада ЗША ў Маскве апублікавала афіцыйнае папярэджанне ў сувязі з падазрэннем на лёгачную чуму ў Іркуцкай вобласці. Амерыканцам нагадалі, што з Расіі ім варта неадкладна з'ехаць.

Пра гэта паведамляе сайт амбасады ЗША ў Расіі.

У дыпмісіі сочаць за паведамленнямі з Іркуцкай вобласці пра верагодны выпадак лёгачнай чумы, смерць чалавека, каранцін і закрыццё бальніц.

У той жа час у амбасадзе прызнаюць, што магчымасці дапамагчы амерыканцам у Расіі абмежаваныя, асабліва па-за межамі Масквы. Супрацоўнікам урада ЗША могуць дадаткова абмежаваць паездкі ў асобныя рэгіёны з-за пагрозаў для здароўя і бяспекі.

Тым, хто знаходзіцца ў рэгіёне, раяць выконваць указанні мясцовых медыкаў, пазбягаць устаноў, дзе ўведзены каранцін, і неадкладна звяртацца да лекара ў выпадку ліхаманкі або сімптомаў з боку дыхальных шляхоў.

Тыя, хто нядаўна наведаў раён успышкі, павінны сачыць за сваім здароўем на працягу 14 дзён. Амбасада таксама раіць удакладніць у страхоўшчыка магчымасць медыцынскай эвакуацыі і план выезду, які не залежыць ад дапамогі ўрада ЗША.

Дзярждэпартамент ЗША па-ранейшаму захоўвае для Расіі найвышэйшы, чацвёрты ўзровень папярэджання «Не едзьце». Амерыканцам, якія знаходзяцца ў краіне, раяць неадкладна яе пакінуць з-за рызыкі незаконнага затрымання і пагрозаў бяспецы.

Выпадак чумы адбыўся ў Іркуцкай вобласці на пачатку кастрычніка. Уначы на 2 кастрычніка ў бальніцы Шэлехава памерла 28-гадовая лабарантка Іркуцкага процічумнага інстытута, якая, паводле звестак мясцовых СМІ, за тыдзень да гэтага разбіла прабірку з узбуджальнікам лёгачнай чумы. Каля 200 чалавек, якія з ёй кантактавалі, ізалявалі, а афіцыйна дыягназ улады рэгіёна дагэтуль не называюць.

Прэзідэнт ЗША Дональд Трамп заявіў, што ведае пра сітуацыю, і паабяцаў дапамогу Расіі. Паводле яго слоў, узбуджальнікі хваробы сталі мацнейшыя, «як армія», таму раней эфектыўныя лекі цяпер дзейнічаюць горш.