Туркменістан увёў электронную візу для беларусаў

• 7.10.2026, 14:52

Цяпер запрашэнне не патрабуецца.

З 1 кастрычніка Туркменістан увёў электронную візу (e-Visa), якая дазваляе замежнікам уязджаць у краіну, а таксама праязджаць праз яе транзітам. Пра гэта паведаміла Дзяржаўная міграцыйная служба Туркменістана.

У міграцыйнай службе заявілі, што новы лічбавы сэрвіс дапаможа замежным грамадзянам эканоміць час: дакументаабарот пераведзены ў электронны фармат, а ўсе працэдуры можна прайсці хутка і ў спрашчаным парадку.

Як адзначае Беларускі Рэспубліканскі саюз турыстычных арганізацый, раней замежнаму турысту патрабавалася афіцыйнае запрашэнне, зацверджанае міграцыйнай службай Туркменістана. На практыцы гэта азначала, што жадаючы наведаць краіну мусіў звяртацца ў мясцовую ліцэнзаваную турфірму.

Цяпер запрашэнне не патрабуецца. Звычайная віза афармляецца да 7 рабочых дзён, тэрміновая выдаецца за 3 дні, а экспрэс-віза можа быць атрымана за 24 гадзіны. Кошт залежыць ад тыпу візы і тэрмінаў афармлення.