Newsweek падлічыў, колькі Путіну засталося жыць

• 7.10.2026, 14:54

Ён дасягнуў вельмі паказальнага ўзросту.

Пуціну 7 кастрычніка споўнілася 74 гады. Для Пуціна гэта не проста дзень народзінаў, але і вельмі паказальная лічба. Сярэдняя працягласць жыцця мужчын у Расіі складае каля 68 гадоў, піша Newsweek (пераклад — сайт Charter97.org).

Пуцін ужо старэйшы за сярэднюю чаканую працягласць жыцця мужчын у 82 з 85 расійскіх рэгіёнаў. На Чукоццы гэты паказчык складае ўсяго 58,7 года.

Для расіян сітуацыя выглядае асабліва змрочна на фоне вайны супраць Украіны. Паводле ацэнак Mediazona і Рускай службы BBC, да цяперашняга часу ўдалося ўстанавіць імёны 259 тысяч загінулых расійскіх вайскоўцаў. Mediazona і «Медуза» ацэньваюць колькасць загінулых мужчын ва ўзросце ад 18 да 59 гадоў да канца 2025 года ў 352 тысячы.

Пры гэтым дэмаграфічныя праблемы Расіі пачаліся задоўга да вайны. Ад наркотыкаў, ВІЧ, алкаголю і атручванняў кантрафактным метанолам штогод паміраюць тысячы людзей. Жанчыны ў сярэднім жывуць амаль на 12 гадоў даўжэй за мужчын — гэта адзін з самых вялікіх разрываў у свеце.

Пуцін паставіў задачу павялічыць сярэднюю працягласць жыцця ў краіне да 78 гадоў да 2030 года. Але гэтаму дрэнна адпавядае рэальнасць вайны, якая забірае жыцці пераважна маладых мужчын.

«Шмат хто з ягоных расійскіх грамадзян быў бы шчаслівы дажыць і да 60», — пішуць аўтары.

Расійскія ўлады спрабуюць утаіваць дэмаграфічныя праблемы. Расстат не апублікаваў асобную статыстыку па працягласці жыцця мужчын і жанчын за 2024 год, а многія даныя пра смяротнасць і насельніцтва цяпер недаступныя.

Сам Пуцін пры гэтым разважае пра магчымасць падаўжэння чалавечага жыцця. У размове з Сі Цзіньпінам ён заявіў, што дзякуючы развіццю транспланталогіі людзі ў будучыні змогуць «нават дасягнуць неўміручасці».