«Падобны на Пуціна»: расіянка ўчыніла скандал з-за персанажа з «Гары Потэра»

• 7.10.2026, 17:19

Жанчына назвала фігурку «насмешкай з прэзідэнта».

Жыхарка Саратова патрабавала прыбраць з вітрыны кавярні фігурку Добі (персанажа кніг пра «Гары Потэра») і заявіла, што ён падобны на Уладзіміра Пуціна. Жанчына назвала гэта насмешкай з прэзідэнта і прыгразіла выклікаць паліцыю. Пра гэта паведамляе «Осторожно, новости».

Інцыдэнт адбыўся 7 кастрычніка, у дзень нараджэння Пуціна, у кавярні ў Фрунзенскім раёне. Наведвальніца папрасіла баріста выйсці на вуліцу, паказала на фігуру ў вітрыне і заявіла, што «гэтая мордка» нагадвае расійскага прэзідэнта. Супрацоўніца патлумачыла, што перад жанчынай — Добі, персанаж «Гары Потэра», які не мае дачынення да Пуціна.

Наведвальніцу гэта не пераканала: «Гэта не важна, з якога „Гары Потэра“. Ён падобны, вы і самі цудоўна гэта бачыце». Жанчына прыгразіла паведаміць у паліцыю пра выяву, якая «абражае нашага кіраўніка».

На пытанне супрацоўніцы, ці лічыць яна Добі Пуціным, наведвальніца адказала: «Так, гэта ён. Ён падобны. Вы мяне зразумелі? Не нарывайцеся. Я разумею, што вы шараговая работніца, перадайце вашаму кіраўніцтву». «Дык калі вы ў ім убачылі Пуціна, значыць, вы яго і абразілі», — адказала баріста.

Супрацоўнікі кавярні назвалі прэтэнзіі неабгрунтаванымі, а сітуацыю — «крынджовай». Тым не менш фігуру Добі пераставілі, каб «яна не мазоліла людзям вочы».