Страшны сон Лукашэнкі

• Арцём Сініцын, «Салідарнасць»
• 9.10.2026, 8:20

Сёння табе падаруюць запанкі, а заўтра дастануць усе шкілеты з шафы.

Пракуратура Паўднёвай акругі Нью-Ёрка прад'явіла дадатковыя абвінавачанні былому прэзідэнту Венесуэлы Нікаласу Мадура і ягонай жонцы Сіліі Флорэс.

У новым заключэнні гаворыцца, што на працягу больш як двух дзесяцігоддзяў экс-лідар Венесуэлы і ягоная жонка «удзельнічалі ў змове з мэтай здзяйснення катаванняў, у тым ліку супраць грамадзянаў Злучаных Штатаў».

«Мадура і іншыя венесуэльскія лідары ўступілі ў змову з мэтай падаўлення іншадумства шляхам грубых парушэнняў правоў чалавека, аддаючы загады і дапускаючы гвалт, пагрозы і фізічныя катаванні пад прыкрыццём закона», — сцвярджаюць у пракуратуры Паўднёвай акругі Нью-Ёрка.

Новыя абвінавачанні для Мадура — страшны сон Лукашэнкі. Гэта яшчэ адно напамінанне, што ніякі дыялог з адміністрацыяй прэзідэнта ЗША, уключна з асабістымі размовамі па тэлефоне, не з'яўляецца гарантыяй таго, што пра твае грахі ўсе забудуцца. Сёння табе падаруюць запанкі, а заўтра дастануць усе шкілеты з шафы.

Муамар Кадафі не дасць схлусіць. Яму ўдалося на кароткі тэрмін вярнуцца ў вялікую міжнародную палітыку, нягледзячы на статус арганізатара маштабнага тэракта. Але колькі вяроўцы ні віцца…

Арцём Сініцын, «Салідарнасць»