Атакі дронаў ЗСУ на дата-цэнтры «Яндэкса» выклікалі збоі ў працы «Алісы»
- 9.10.2026, 17:35
Магчымыя затрымкі з адказамі нейрасеткі.
Атакі беспілотнікаў на два дата-цэнтры «Яндэкса» ў Разанскай і Калужскай абласцях прывялі да перабояў у працы галасавога памочніка «Алісы» і іншых сэрвісаў кампаніі. На прыладах «Станцыя» магчымыя затрымкі з адказамі нейрасеткі, а некаторыя функцыі разумнага дома могуць працаваць нестабільна, паведаміла каманда «Алісы». Спецыялісты займаюцца аднаўленнем інфраструктуры, аднак у «Яндэксе» пакуль не могуць назваць тэрміны рамонту абсталявання, піша The Moscow Times.
На тле атак «Яндэкс» дамовіўся з воблачнымі правайдарамі VK Cloud, Selectel і K2Cloud аб паскораным пераносе даных і сэрвісаў кліентаў. Паводле паведамленняў кампаніі, для гэтага выдзелілі дадатковыя каманды спецыялістаў, прадугледзелі гнуткія фінансавыя ўмовы і спрасцілі падключэнне. У прэс-службе «Яндэкса» запэўнілі, што каманды кампаніі і партнёраў сумесна працуюць над тым, каб зрабіць перанос «максімальна хуткім і бясшвоўным».
Першы ўдар па інфраструктуры «Яндэкса» прыйшоўся на дата-цэнтр у Сасове Разанскай вобласці ў ноч на 8 кастрычніка. Пасля атакі на аб’екце здарыўся пажар, і яго працу цалкам спынілі. У ноч на 9 кастрычніка беспілотнікі атакавалі пляцоўку кампаніі ў Калуге, дзе некалькі модуляў дата-цэнтра таксама былі цалкам выведзеныя з ладу.
Пасля пашкоджання інфраструктуры ў Сасове ў расійскім сегменце інтэрнэту адбыўся маштабны збой. Паводле даных маніторынгавых сэрвісаў «Сбой.рф» і Downdetector, непаладкі закранулі, у прыватнасці, сайты і прыкладанні Т-Банка, МТС-Банка, Совкомбанка і Альфа-Банка, «Авито», РЖД, прадуктовых сетак і прадаўцоў электронікі. Раніцай 9 кастрычніка частка сэрвісаў працягвала працаваць з перабоямі.
Усяго ў «Яндэкса» пяць дата-цэнтраў: чатыры ў Расіі — у Сасове, Калуге, Мыцішчах і ва Уладзіміры — і адзін у Фінляндыі, які з-за санкцый адключылі ад электразабеспячэння. У дата-цэнтры ў Сасове размяшчаліся два з трох суперкамп’ютараў кампаніі, якія выкарыстоўваюцца для навучання мадэлі штучнага інтэлекту YandexGPT.
Атакам на аб’екты «Яндэкса» папярэднічаў удар расійскай арміі па дата-цэнтру «Датагруп» у Кіеве напрыканцы верасня. Прэзідэнт Украіны Уладзімір Зяленскі пасля гэтага заявіў, што Кіеў будзе сімметрычна адказваць на расійскія абстрэлы.