Мінск амаль два гады забяспечваецца толькі артэзіянскай вадой

• 9.10.2026, 17:49

На гэтым фоне пачалі мелець калодзежы.

У студзені 2025-га Мінск поўнасцю перайшоў на артэзіянскае водазабеспячэнне, да гэтага траціна горада атрымлівала ваду з адкрытых крыніц. З-за амаль сотні прасвідраваных свідравін ужо ёсць «першыя званочкі» пагаршэння сітуацыі з падземнымі водамі, расказаў дзяржаўнаму выданню «Прысталічча» кіраўнік водаканала Мінскага раёна Дзмітрый Дрозд.

Да нядаўняга часу Мінск быў адзіным горадам у краіне, які атрымліваў артэзіянскую ваду часткова: з крыніц паступала толькі 70% вады, астатняе горад браў з павярхоўных вадаёмаў. Каб замяніць гэтую долю, прасвідравалі амаль сотню свідравін, стварылі сістэму перапампоўкі.

«Мы баяліся, што ўзровень вады ў свідравінах упадзе. І трывожныя званочкі ёсць: у звычайных калодзежах пачала знікаць вада, і гэта першы прадвестнік падзення ўзроўню падземных вод», — расказаў Дрозд.

Ён таксама адзначыў, што глыбіня артэзіянскіх свідравін не ўплывае на чысціню вады. Так, пад Мінскам вада з глыбокіх свідравін мае «пахучую» прымесь.

«Гэта было зафіксавана ў свідравінах глыбінёй 200 метраў і больш — у Прэлессе, Міханавічах, Прылуках, Зялёнай Гавані. Адна малекула на мільён малекул вады адчуваецца нюхам. А выявілі якраз у глыбокіх свідравінах, і гэта абвяргае міф „чым глыбей, тым лепш“. Тым не менш падстаў для непакою няма: працэнт мізэрны, канцэнтрацыя не перавышае нормы», — запэўніў кіраўнік водаканала.

Асобна ён падкрэсліў, што фільтры са зваротным асмасам могуць шкодзіць здароўю, калі за імі не сачыць:

«Зваротны асмас дае велізарны перарасход: на літр пітной вады — яшчэ два літры ў каналізацыю. Мембрана затрымлівае і шкоднае, і карыснае — кальцый, магній, іншыя мінералы. Без мінералізатараў вада атрымліваецца „збяднелай“. Мы як прадпрыемства маглі б прамаўчаць, але папярэдзім: калі ўстанавілі такую сістэму, сачыце за станам мінералізатараў. Пры няправільным абслугоўванні яны могуць нанесці шкоду здароўю — большую, чым вада з крана», — расказаў Дрозд.