У Беларусі пройдзе аперацыя «Арсенал»

• 9.10.2026, 22:16

З 19 па 23 кастрычніка.

З 19 па 23 кастрычніка ў Беларусі пройдзе спецыяльнае комплекснае мерапрыемства «Арсенал». Органы ўнутраных спраў будуць выяўляць і спыняць парушэнні, звязаныя з абаротам зброі, боепрыпасаў і выбуховых рэчываў.

Такія мерапрыемствы пройдуць у розных рэгіёнах краіны. Іх мэта — папярэджанне і спыненне правапарушэнняў у сферы абароту зброі.

У Цэнтральным РУУС Мінска нагадалі, што за незаконны абарот зброі, боепрыпасаў, выбуховых прылад і выбуховых рэчываў прадугледжаная крымінальная адказнасць. Максімальнае пакаранне — да 12 гадоў пазбаўлення волі.

Пры гэтым чалавек, які добраахвотна здасць зброю, боепрыпасы або выбуховыя рэчывы, што незаконна захоўваюцца, вызваляецца ад крымінальнай і адміністрацыйнай адказнасці.

Паведаміць пра незаконна захоўваную зброю або даведацца парадак яе добраахвотнай здачы можна па тэлефоне 102.

Аперацыю «Арсенал» у Беларусі праводзілі і раней. Напрыклад, у кастрычніку 2023 года міліцыя правярала ўмовы захоўвання зарэгістраванай зброі і выяўляла ўладальнікаў нелегальных арсеналаў. Тады праваахоўнікі таксама заклікалі грамадзян добраахвотна здаваць незарэгістраваную зброю.