Абвал ключавога моста ў РФ: цягнік сышоў пад адхон

• 10.11.2026, 13:47

Сярод асноўных версій — дыверсія.

Раніцай у аўторак у Расіі абрынуўся пралёт чыгуначнага моста праз раку Віледзь у Архангельскай вобласці. Вагоны грузавога саставу сышлі з рэек. Аварыя здарылася каля 05:10 на перагоне Чаромха – Віледзь, паведаміў губернатар рэгіёна Аляксандр Цыбульскі, перадае «Диалог».

Паводле папярэдніх даных, абышлося без пацярпелых. Чаму абрынуўся мост, пакуль невядома. Рух на ўчастку спынены, восем пасажырскіх цягнікоў затрымліваюцца.

Тэлеграм-канал Exilenova+ піша, што сярод асноўных версій разглядаецца дыверсія, аднак афіцыйнага пацвярджэння гэтаму няма. Заўважым, што Мінабароны Расіі за ноч паведаміла пра збіццё 155 украінскіх беспілотнікаў над дзевяццю рэгіёнамі, але Архангельскай вобласці ў гэтым спісе няма.

Мост уваходзіць у склад Пячорскай чыгуначнай магістралі, важнага транспартнага калідора, па якім ажыццяўляюцца пасажырскія і грузавыя перавозкі ў паўночныя рэгіёны РФ. З-за абрушэння рух на гэтым участку паралізаваны, а чыгуначная лагістыка парушана.