Еўразвяз уводзіць новыя маштабныя санкцыі супраць РФ

• 12.11.2026, 9:46

Названая дата.

16 лістапада 2026 года Савет Еўразвязу па замежных справах зацвердзіць новыя санкцыі супраць Расіі за яе ўварванне ва Украіну. Пра гэта ў сваім акаўнце ў сацыяльнай сетцы X паведаміў міністр замежных спраў Францыі Жан-Ноэль Барро.

Паслы дзяржаў Еўразвязу на пасяджэнні Камітэта пастаянных прадстаўнікоў папярэдне ўзгаднілі новыя санкцыі супраць РФ у сераду, 11 лістапада.

Пад спецыяльныя меры еўрапейскіх краін трапяць 145 фізічных і юрыдычных асоб, датычных да паўнамаштабнага ўварвання акупацыйнай арміі Расіі ва Украіну. Акрамя таго, у санкцыйныя спісы ўнясуць юрыдычныя і фізічныя асобы, датычныя да кібератак і гібрыднай вайны на Старым кантыненце.

Пад новыя еўрапейскія санкцыі, у прыватнасці, трапяць 50 расійскіх банкаў. Будуць прыняты і новыя меры супраць караблёў расійскага «ценявога флоту», якія дапамагаюць Маскве абыходзіць раней уведзеныя краінамі Захаду спецыяльныя эканамічныя меры.