Беларусам прапанавалі зніжкі на гародніну ўзамен на макулатуру і шкло

• 12.11.2026, 13:37

Прапановай могуць скарыстацца гамяльчане.

У Беларусі праходзяць акцыі, у межах якіх за здадзеную другасную сыравіну даюць зніжкі на гародніну на сельскагаспадарчых кірмашах. Адна з іх даступная гамяльчанам, паведамляе belkagomel.by.

Жыхарам, якія збіраюцца на сельскагаспадарчы кірмаш на пляцоўцы каля крамы «Еўраопт» на вуліцы Хатаевіча, варта ўзяць з сабой макулатуру і шкло. З 09:00 да 15:00 там будзе працаваць пункт прыёму другасных рэсурсаў «Спецкамунтранса». Тыя, хто здасць другасную сыравіну, змогуць набыць сельскагаспадарчую прадукцыю па зніжанай цане, а таксама атрымаюць падарункі.

Акрамя таго, з 10 да 12 гадзін у самой краме пройдуць дэгустацыі прадукцыі «Мілкавіта», «Спартак», «Гомельхлебпром» і Гомельскага тлушчавага камбіната.

У выхадныя кірмашы разгорнуцца і на іншых папулярных пляцоўках абласнога цэнтра.