Украінскі паліцэйскі прыкрыў сабой дзевяцігадовага хлопчыка ад удару дрона

• 14.11.2026, 22:33

Відэафакт.

У Глухаве Сумскай вобласці Украіны паліцэйскі Мікалай Саўчанка прыкрыў сабой дзевяцігадовага хлопчыка падчас паўторнага ўдару расійскага дрона раніцай 14 лістапада. Відэа з нагруднай камеры праваахоўніка апублікаваў у Telegram міністр унутраных спраў Украіны Іван Выгоўскі.

Расійская армія атакавала жылы раён Глухава каля 6:00. На месца прыбылі паліцэйскія Мікалай Саўчанка і Ігар Валошка. Сярод руін дома яны выявілі жанчыну і яе дзевяцігадовага ўнука. Менавіта хлопчык пачуў праваахоўнікаў і стаў клікаць на дапамогу.

Пакуль Саўчанка накладаў жанчыне турнікет, паступіла папярэджанне пра пагрозу паўторнага ўдару. Паліцэйскія вырашылі эвакуяваць сям'ю ў бальніцу на службовым аўтамабілі, але паспелі ад'ехаць толькі на некалькі сотняў метраў, калі дрон пачаў зніжацца.

«Я выжыву?» — спытаў хлопчык перад паўторным ударам. Саўчанка прыкрыў хлопчыка сабой і працягваў яго супакойваць. «Я думаў, што памру. Дзякуй вам, дзядзька паліцэйскі», — сказаў хлопчык пасля выбуху.

Валошка таксама быў паранены. Нягледзячы на гэта, паліцэйскія пасадзілі жанчыну з унукам у машыну і давезлі да бальніцы. Паводле слоў Выгоўскага, жыццю пацярпелых нічога не пагражае.

«Акупанты свядома наносяць паўторныя ўдары па мірных жыхарах, па дзецях, па тых, хто прыязджае на дапамогу. Толькі з пачатку тыдня ратавальнікі і паліцэйскія здзейснілі амаль 700 выездаў на ліквідацыю наступстваў расійскіх абстрэлаў па рэгіёнах Украіны. Удалося выратаваць 41 чалавека», — дадаў кіраўнік МУС.