Сыбіга: У Пуціна, які марыць, ёсць адна праблема

• 15.11.2026, 15:12

Расія патраціла чатыры гады і восем месяцаў на «амаль захоп» вёскі Малая Токмачка.

На гэтым этапе прэзідэнт Расіі Уладзімір Пуцін можа дамаўляцца ў лепшым выпадку пра справядлівае спыненне агню ўздоўж цяперашняй лініі судакранання, а не пра сферы ўплыву ў Еўропе.

Пра гэта на сваёй старонцы ў X напісаў міністр замежных спраў Украіны Андрэй Сыбіга, які нагадаў, што Пуцін вылучае ідэі пра перагляд еўрапейскага парадку бяспекі.

«У сваіх марах ён бачыць сябе на Ялцінскай канферэнцыі 1945 года. Праблема ў тым, што для прапаноў такога маштабу спачатку трэба выйграць сусветную вайну», — падкрэсліў чыноўнік.

Ён нагадаў, што Расія патраціла чатыры гады і восем месяцаў на «амаль захоп» вёскі Малая Токмачка ў Запарожскай вобласці.

Акрамя таго, краіна-агрэсар страціла больш за 1,6 мільёна вайскоўцаў забітымі і параненымі, але «не дасягнула ніводнай мэты свайго ўварвання». У прыватнасці, у кастрычніку Расія страціла 54 тысячы 400 акупантаў, тады як Украіна вызваліла больш тэрыторыі, чым Расіі ўдалося захапіць.

«На гэтым этапе Пуцін можа дамаўляцца ў лепшым выпадку пра справядлівае спыненне агню ўздоўж цяперашняй лініі судакранання, а не пра сферы ўплыву ў Еўропе. Шчыра кажучы, Еўропе не патрэбны новы парадак бяспекі. У яе ўжо ёсць адзін, які Расія пастаянна парушае», — падкрэсліў Сыбіга.

Украінскі міністр таксама дадаў, што найлепшы план для бяспечнай і вольнай Еўропы — гэта спыніць агрэсію Расіі супраць Украіны.