Швецыя ўслед за Фінляндыяй і Нарвегіяй забароніць уезд расійскім спартсменам
- 15.11.2026, 16:39
Да заканчэння вайны РФ з Украінай
Урад Швецыі не мае намеру дапускаць расійскіх спартсменаў да ўдзелу ў міжнародных спаборніцтвах на тэрыторыі каралеўства, пакуль працягваецца вайна ва Украіне. Улады распрацоўваюць механізм, які дазволіць адмаўляць ім ва ўездзе, у тым ліку пры наяўнасці віз іншых краін Шэнгенскай зоны, заявіў міністр спорту Швецыі Якоб Форссмед у інтэрв'ю AFP. «Наша прынцыповая пазіцыя ў тым, што мы не хочам бачыць расійскіх спартсменаў на шведскай зямлі падчас міжнародных спаборніцтваў, бо гэта дае Расіі і Путіну магчымасць выкарыстоўваць сітуацыю ў прапагандысцкіх мэтах і спрыяе нармалізацыі вайны», — сказаў ён.
Паводле слоў Форссмеда, механізм павінен запрацаваць да пачатку чэмпіянату свету па лыжных відах спорту, які пройдзе ў лютым–сакавіку 2027 года ў шведскім горадзе Фалун. Міжнародная федэрацыя лыжнага спорту і сноўборда (FIS) дазволіла расійскім і беларускім спартсменам выступаць на спаборніцтвах пры выкананні шэрагу ўмоў, у тым ліку без нацыянальнай сімволікі. Шведская лыжная асацыяцыя раней заявіла, што не згодная з гэтым рашэннем, але будзе яго выконваць. Раней у лістападзе пра намер забараніць уезд расійскім спартсменам абвясцілі Фінляндыя і Нарвегія. У першай краіне абмежаванні пачнуць дзейнічаць з 16 лістапада. У прыватнасці, Фінляндыя спыніць выдачу кароткатэрміновых працоўных віз тэрмінам да 90 дзён, якія маглі атрымліваць спартсмены. Гэта закране і тых, каму дазволілі спаборнічаць у нейтральным статусе. Нарвегія 12 лістапада абвясціла, што не будзе дапускаць на сваю тэрыторыю расійскіх прафесійных спартсменаў, а таксама суправаджальны персанал. У рашэнні гаворыцца, што гэтыя атлеты цесна звязаныя з уладамі і дзяржаўнымі структурамі сваёй краіны, таму іх удзел у міжнародных спаборніцтвах нельга разглядаць адасоблена ад працяглай вайны ва Украіне.
Да гэтага Спартыўны арбітражны суд (CAS) абавязаў Міжнародную федэрацыю хакея (IIHF) дапусціць расійскія зборныя да спаборніцтваў сезона 2026/27. Хакейныя федэрацыі Нарвегіі, Швецыі, Латвіі, Фінляндыі, Даніі і Чэхіі заявілі, што не маюць намеру гуляць супраць каманд з РФ. У Германіі дапусцілі адмову ад правядзення чэмпіянату свету 2027 года, а прэм’ер Канады Марк Карні паведаміў, што расійскім хакеістам не выдадуць візы на маладзёжны чэмпіянат свету ў канцы снежня.
IIHF абскардзіла рашэнне суда, заявіўшы пра магчымы канфлікт інтарэсаў і нераскрытыя дзелавыя сувязі з Расіяй у двух з трох арбітраў калегіі CAS, якія вынеслі вердыкт на карысць вяртання краіны на міжнародныя спаборніцтвы.