Загадкавы аб'ект у космасе збянтэжыў навукоўцаў
- 18.11.2026, 17:53
Яго рух не паддаецца тлумачэнню.
Астраномы выявілі незвычайныя паводзіны невялікага касмічнага аб'екта, рух якога немагчыма растлумачыць толькі дзеяннем гравітацыі. Як піша The New York Times, гаворка ідзе пра аб'ект пад назвай 1998 KY26 — камяністае цела дыяметрам каля 11 метраў, што круціцца вакол Сонца. Яго траекторыя мае адхіленні, прычыны якіх дасюль застаюцца прадметам навуковых дыскусій. У прыватнасці, даследчыкі спрачаюцца, ці можа гэта быць камета, астэроід або аб'ект іншага паходжання.
У той жа час адзначаецца, што гаворка дакладна не пра іншапланетны карабель або страчаны савецкі касмічны апарат.
Аб'ект 1998 KY26 адкрыў у 1998 годзе астраном Арызонскага ўніверсітэта Том Герэлс. Спачатку лічылі, што гэта звычайны астэроід. Аднак яго незвычайныя паскарэнні прымушаюць яго адхіляцца ад арбіты, якую можна было б прадказаць паводле законаў руху планет Ёгана Кеплера. Гэтыя законы вывучаюць пакаленні студэнтаў-фізікаў. Адхіленні вельмі нязначныя, але маюць навуковае значэнне.
Адна з гіпотэз заключалася ў тым, што 1998 KY26 — так званая «цёмная камета». Так называюць аб'екты, якія не маюць характэрнага хваста з пылавых часцінак. Звычайна ён утвараецца, калі пад уздзеяннем сонечнага цяпла падпавярхоўны лёд выпараецца. Гэты працэс называецца сублімацыяй, і ён можа выклікаць паскарэнне, падобнае да таго, што назіраецца ў 1998 KY26.
Аднак новае даследаванне, апублікаванае ў навуковым часопісе Icarus, яшчэ больш паглыбіла загадку. Аўтары сцвярджаюць, што сярэдняя тэмпература аб'екта складае каля мінус 47 градусаў па Цэльсіі — гэта значна вышэй за тэмпературны парог, пры якім можа захоўвацца лёд.
«Калі ў аб'екта ёсць лёд, то гэта камета», — патлумачыў дацэнт кафедры фізікі і астраноміі Мічыганскага дзяржаўнага ўніверсітэта Дарыл З. Селігман, які раней быў адным з вядучых прыхільнікаў гіпотэзы пра «цёмную камету».
Аднак калі лёду няма, то аб'ект нельга лічыць каметай. «Паверхня KY26 занадта цёплая», — адзначыў вучоны. Такім чынам, адно з самых простых тлумачэнняў незвычайных паводзінаў аб'екта адпадае.
Селігман дадаў, што, нягледзячы на сучасныя магчымасці даследавання далёкага космасу, наваколазямныя аб'екты ўяўляюць сабой асобную навуковую праблему. «Пра аб'екты, вельмі блізкія да Зямлі, не так шмат звестак. Яны надзвычай малыя і цьмяныя», — патлумачыў ён.
Сваю версію прапанаваў і астрафізік Гарвардскага ўніверсітэта Аві Леб, вядомы сваімі супярэчлівымі заявамі пра магчымасць існавання пазаземнага жыцця. У інтэрв'ю Fox News Digital ён выказаў здагадку, што 1998 KY26 — гэта не камета і не астэроід, а савецкі беспілотны касмічны апарат «Фобас-1».
Гэты апарат запусцілі ў 1988 годзе для даследавання Марса, але прыкладна праз два месяцы пасля старту сувязь з ім была страчана. Калі гіпотэза Леба слушная, «Фобас-1» дзесяцігоддзямі заставаўся непрыкметным у космасе.