У Беларусі з'явіўся дадатак для рэгістрацыі ў чарзе для перасячэння мяжы
- 18.11.2026, 18:45
Рэгістравацца стане лягчэй.
У Беларусі запусцілі дадатак для рэгістрацыі ў чарзе на мяжы. Ён разлічаны на вадзіцеляў і перавозчыкаў, якія праязджаюць праз памежныя пункты пропуску, паведамілі ў «Белтаможсэрвісе». Паводле задумы распрацоўнікаў, сэрвіс зробіць рэгістрацыю хутчэй і зручней.
Што можна рабіць праз дадатак
Звыклыя спосабы рэгістрацыі ніхто не адмяняў: стаць у чаргу па-ранейшаму можна на сайце або непасрэдна ў зоне чакання. Дадатак будзе карысным тым, хто аддае перавагу хутка аформіць усё дыстанцыйна.
Уладальнікам Android-прылад трэба спампаваць устаноўчы файл на афіцыйным сайце «Белтаможсэрвіса» і ўсталяваць яго на смартфон. Карыстальнікам iPhone варта скарыстацца інструкцыяй ад сэрвісу, пасля чаго можна стварыць значок для хуткага доступу на экране тэлефона.
Пра што важна памятаць
Для кожнага транспартнага сродку патрэбна асобная рэгістрацыя.
Перанесці чаргу без паўторнай рэгістрацыі нельга. Змяніць дзяржаўны нумар транспартнага сродку пасля рэгістрацыі таксама не атрымаецца. Акрамя таго, аплата паслугі не замяняе саму рэгістрацыю.
У «Белтаможсэрвісе» разлічваюць, што дадатак прыкметна палегчыць вадзіцелям перасячэнне мяжы.
Дарэчы, нядаўна абвясцілі і пра яшчэ адну навіну для падарожнікаў: праз беларуска-польскую мяжу запусцяць новыя хуткасныя аўтобусы.