У ЗША расіяніна абвінавацілі ў шпіянажы супраць амерыканскай абароннай кампаніі
- 19.11.2026, 6:02
Мужчына незаконна ўехаў у ЗША летам 2026 года.
Міністэрства юстыцыі ЗША прад’явіла абвінавачанне расіяніну Ігару Д’ю у шпіянажы супраць амерыканскай тэхналагічнай і абароннай кампаніі ў Крамянёвай даліне.
Пра гэта паведаміла прэс-служба Мінюста.
Паводле звестак ведамства, мужчына збіраў інфармацыю ў інтарэсах урада Расіі.
Мужчыну затрымалі ў кастрычніку. Ігара Д’ю таксама абвінавачваюць у махлярстве з выкарыстаннем падробленых дакументаў, якія пацвярджаюць асобу. Паводле версіі следства, яго завербавалі саўдзельнікі праз мэсэнджар Telegram, даручыўшы яму таемна сачыць за супрацоўнікамі абаронна-тэхналагічнай кампаніі з Крамянёвай даліны. Саўдзельнікі Д’ю заяўлялі, што кампанія, за якой ён сачыў, пастаўляе зброю Украіне для вядзення баявых дзеянняў з Расіяй.
Следства лічыць, што мужчына незаконна ўехаў у ЗША летам 2026 года. Пасля гэтага яго завербавалі для сачэння. За якой менавіта кампаніяй сачыў расіянін, не ўдакладняецца. Прыводзіцца толькі месцазнаходжанне яе офіса — Пала-Альта, штат Каліфорнія. Саўдзельнікі забяспечвалі яго абсталяваннем і фінансаваннем, каб мужчына сачыў за супрацоўнікамі кампаніі. У прэс-рэлізе адзначаецца, што расіянін ведаў хатнія адрасы некаторых работнікаў, у тым ліку аднаго з высокапастаўленых кіраўнікоў. Некаторых супрацоўнікаў ён адсочваў на вуліцы. У кавярні побач з офісам кампаніі ён фатаграфаваў экраны ноўтбукаў і дасылаў здымкі саўдзельнікам.
Першае слуханне па справе Ігара Д’ю адбылося ў федэральным судзе 2 лістапада, і з таго часу ён знаходзіцца пад вартай. Наступнае слуханне прызначана на 24 лістапада.