BE RU EN

Беларус зняў п'яную калегу на карпаратыве і паплаціўся за відэа

  • 19.11.2026, 8:59

Але спачатку ён выйграў суд.

Работніка адной кампаніі звольнілі пасля таго, як ён апублікаваў у сацсетках відэа з п'янай калегай на карпаратыве. Мужчына дамогся аднаўлення на працы праз суд, аднак пазней прайграў іншую судовую спрэчку з-за таго ж роліка, расказаў «Мінскай праўдзе» адвакат Мінскай абласной калегіі адвакатаў Аляксей Артюховіч.

Спецыяліст аддзела продажаў на навагоднім карпаратыве зняў на відэа галоўную бухгалтарку кампаніі, якая знаходзілася ў стане моцнага алкагольнага ап'янення. Потым ён апублікаваў ролік у сацсетцы, указаўшы назву арганізацыі.

Кіраўніцтва запатрабавала выдаліць запіс, але работнік адмовіўся, пасля гэтага яго звольнілі за сістэматычнае невыкананне працоўных абавязкаў. Падставай стала тое, што раней у мужчыны ўжо было дысцыплінарнае спагнанне за спазненне, а публікацыю відэа наймальнік расцаніў як парушэнне правілаў унутранага працоўнага распарадку.

Мужчына звярнуўся ў суд з патрабаваннем аднавіць яго на працы. Суд задаволіў пазоў, указаўшы, што публікацыя роліка ў непрацоўны час на асабістай старонцы не адносіцца да працоўных абавязкаў работніка, таму дысцыплінарнага праступку не было. Звальненне прызналі незаконным.

Аднак гісторыя атрымала працяг — цяпер ужо галоўная бухгалтарка падала асобны пазоў аб абароне гонару, годнасці і дзелавой рэпутацыі. На гэты раз суд стаў на яе бок і абавязаў мужчыну выдаліць відэазапіс і выплаціць кампенсацыю, паколькі жанчына не давала згоды на публікацыю роліка.

Адвакат прывёў і іншы прыклад судовага разбіральніцтва пасля карпаратыву: работнік лагістычнага цэнтра падчас выязнога мерапрыемства ў загарадным комплексе ўпаў і парваў звязкі. У бальніцы ў яго таксама выявілі алкаголь у крыві.

Мужчына запатрабаваў ад наймальніка прызнаць траўму вытворчай, паколькі карпаратыў цалкам аплачвала арганізацыя і мерапрыемства, на яго думку, праводзілася ў яе інтарэсах. Атрымаўшы адмову, работнік звярнуўся ў суд.

Аднак суд устанавіў, што карпаратыў праходзіў у суботу, якая была для работніка выхадным днём. Загад аб абавязковай прысутнасці работнікаў не выдаваўся, улік рабочага часу ў гэты дзень не вёўся, а сам мужчына не выконваў працоўных абавязкаў.

У выніку суд прызнаў траўму бытавой. Паколькі медыкі таксама ўстанавілі, што яна была звязана з алкагольным ап'яненнем, першыя шэсць календарных дзён бальнічнага работніку не аплацілі, а пачынаючы з сёмага дня дапамогу выплачвалі ў памеры 50%. Суд прызнаў дзеянні наймальніка законнымі.

Юрыст патлумачыў, што само па сабе размяшчэнне фатаграфій і відэа з карпаратыву ў асабістых сацсетках у непрацоўны час звычайна не з'яўляецца падставай для вымовы або звальнення. Выключэнні магчымыя, калі публікацыя парушае заканадаўства, напрыклад раскрывае камерцыйную таямніцу.

Пры гэтым работніка могуць пазбавіць прэміі або знізіць яе памер, калі ўнутраныя дакументы арганізацыі прадугледжваюць захаванне дзелавой этыкі і недапушчэнне дзеянняў, што шкодзяць рэпутацыі кампаніі.

Патрабаваць выдалення фотаздымкаў з асабістага ўліковага запісу толькі на падставе працоўных адносін наймальнік таксама не мае права. Аднак кампанія можа звярнуцца ў суд, калі апублікаваныя звесткі ганьбяць яе дзелавую рэпутацыю. Акрамя таго, размяшчэнне здымкаў калег без іх згоды можа парушаць заканадаўства аб абароне персанальных дадзеных.

Што да траўмаў на карпаратывах, вызначальнае значэнне маюць умовы правядзення мерапрыемства. Калі ўдзел быў добраахвотны, свята праходзіла ў непрацоўны час і работнік не выконваў даручэнняў кіраўніцтва, траўму, як правіла, прызнаюць бытавой. Калі ж карпаратыў арганізавалі ў рабочы час па распараджэнні наймальніка з абавязковай прысутнасцю работнікаў, абставіны могуць стаць падставай для прызнання траўмы вытворчай.

Апошнія навіны