BE RU EN

У Беларусі змяняюць правілы выгулу сабак

  • 20.11.2026, 14:24

Будзе ўжорстчанне.

Уявіце звычайную прагулку з сабакам: у двары можна ісці на звыклым павадку, перад уваходам у ліфт давядзецца яго скароціць або ўзяць гадаванца на рукі, а адпусціць пабегаць без павадка атрымаецца толькі на спецыяльнай пляцоўцы. І гэта яшчэ не ўсё. Згодна з праектам новых правілаў, гуляць з сабакам не змогуць непаўналетнія і людзі ў стане ап'янення, а ўладальнікам давядзецца абавязкова насіць пры сабе сродкі для прыбірання за гадаванцам, піша smartpress.by.

Міністэрства жыллёва-камунальнай гаспадаркі Беларусі апублікавала серыю відэаролікаў, у якіх патлумачыла асноўныя палажэнні праекта пастановы Савета Міністраў «Аб мерах па рэалізацыі закона "Аб адказным абыходжанні з жывёламі"». Разбіраемся, што прапануюць змяніць і да чаго варта падрыхтавацца ўладальнікам сабак.

Пакуль гэта толькі праект, і магчымыя змены павінны прайсці ўсталяваную працэдуру прыняцця. І ўсё ж.

Павадок — асноўнае правіла. А як наконт намордніка?

Згодна з праектам, выгуляць сабак трэба будзе на павадку, які дазваляе гаспадару кантраляваць жывёлу і забяспечвае бяспеку навакольных, іншых гадаванцаў і маёмасці.

Прадбачана і магчымасць прагулак без павадка. Праўда, не дзе заўгодна, а на спецыяльна абсталяваных пляцоўках для выгулу і дрэсыроўкі сабак.

Асобныя патрабаванні датычацца наморднікаў. У МінЖКГ патлумачылі, што для сабак, якія патрабуюць асаблівай адказнасці ўладальніка, а таксама прызнаных небяспечнымі (у пакуль не зацверджаным спісе налічваецца 45 парод), прадугледжаны дадатковыя меры бяспекі. У прыватнасці, па-за межамі спецыяльных пляцовак такіх жывёл трэба будзе выгуляць на павадку і ў намордніку.

Калі такая сабака жыве ў прыватным або блакіраваным доме, на дачы ці ў садовым доміку, гаспадар павінен забяспечыць яе ўтрыманне на павадку, у вальеры або за надзейнай агароджай, праз якую жывёла не зможа самастойна выйсці за межы тэрыторыі.

Праект таксама прадугледжвае дадатковыя патрабаванні да людзей, якім уладальнікі давяраюць выгул такіх сабак. Аднак падрабязны пералік гэтых патрабаванняў у апублікаваных тлумачэннях міністэрства пакуль не прыводзіць.

У ліфце і на дзіцячай пляцоўцы павадок давядзецца скаротіць

Звычайны павадок не заўсёды дазволіць выканаць патрабаванні праекта. У некаторых месцах сабаку трэба будзе трымаць на кароткім павадку або ўзяць на рукі.

Гэта датычыцца:

перасячэння праезнай часткі;

ліфтаў;

дапаможных памяшканняў шматкватэрных жылых дамоў (пад’езды, лесвіцы, калідоры і праходы да кватэр), будынкаў і інтэрнатаў;

дзіцячых пляцовак.

Гэтая логіка зразумелая: у такіх месцах прастора абмежаваная, побач могуць знаходзіцца іншыя людзі і дзеці, таму гаспадару важна мець магчымасць хутка кантраляваць рухі жывёлы.

За сабакай давядзецца прыбіраць адразу

Яшчэ адно патрабаванне, якое непасрэдна датычыцца кожнай прагулкі, — прыбіранне за гадаванцам.

Праект прадугледжвае, што ў ўладальніка павінны быць пры сабе сродкі для прыбірання, а самі забруджванні трэба ліквідоўваць неадкладна.

То-бок недастаткова проста ўзяць пакецік на ўсялякі выпадак. Калі сабака пакінула сляды на тратуары, у двары або ў парку, гаспадару давядзецца адразу навесці там парадак.

Гэта правіла датычыцца не толькі эстэтыкі гарадскіх вуліц. Ідзе гаворка пра санітарыю і камфорт людзей, якія карыстаюцца агульнымі тэрыторыямі. Пакуль незразумела, хто і як будзе гэта адсочваць, і якое пакаранне пагражае ўладальніку сабакі за невыкананне патрабавання.

Дзе можна будзе адпусціць сабаку пабегаць?

Для свабоднага выгулу і дрэсыроўкі прадугледзяць спецыяльныя пляцоўкі. Прычым яны павінны быць не проста абазначаныя шыльдай на ўчастку зямлі.

Паводле праекта такія месцы абсталююць:

агароджай;

інфармацыйнымі знакамі;

кантэйнерамі для прыбірання за жывёламі.

Прадбачваецца і свабодны доступ уладальнікаў разам з гадаванцамі.

Задача абуладкавання пляцовак у гарадах і пасёлках гарадскога тыпу ўскладаецца на мясцовыя выканаўчыя і распарадчыя органы.

Для гаспадароў гэта можа стаць зручнай альтэрнатывай прагулкам на доўгім павадку ў дварах і парках: на агароджанай тэрыторыі сабака зможа свабодна рухацца, гуляць і займацца дрэсыроўкай.

Каму ўвогуле нельга будзе выгуляць сабаку?

У праекце ёсць і патрабаванне да самога чалавека, які трымае павадок.

Згодна з тлумачэннямі МінЖКГ, выгульваць сабак не змогуць:

асобы, прызнаныя судом недзеяздольнымі;

асобы, маладзейшыя за 18 гадоў;

грамадзяне ў стане алкагольнага і/ці наркатычнага ап’янення.

Уладальнік павінен быць здольны кантраляваць паводзіны жывёлы і забяспечваць бяспеку падчас прагулкі.

Атрымліваецца, што нават калі сабака невялікая і спакойная, паводле прапанаваных правілаў яе нельга будзе даручыць для самастойнага выгулу дзіцяці або падлетку.

Што ўладальнікам сабак варта ўлічыць ужо цяпер

Калі праект прымуць у прадстаўленым выглядзе, звыклую прагулку з гадаванцам давядзецца трохі арганізаваць інакш.

Варта загадзя прадумаць, дзе знаходзяцца бліжэйшыя спецыяльныя пляцоўкі, набыць сродкі для прыбірання, а для сабак асобных катэгорый падрыхтаваць павадок і наморднік. Тым, хто звычайна даручае прагулкі дзецям, давядзецца шукаць дарослага суправаджальніка.

Поўны абноўлены тэкст дакумента публічна не прадстаўлены, таму асобныя дэталі будучых правілаў застаюцца неяснымі.

Дакумент таксама закранае правілы ўтрымання жывёл, навучанне ўладальнікаў сабак, што патрабуюць асаблівай адказнасці, адлоў бязнадзорных жывёл і працу прыютаў, пітамнікаў і гасцініц для жывёл.

Праца над змяненнем правілаў утрымання дамашніх жывёл у Беларусі цягнецца не першы год. Папярэднія прапановы выносілі на грамадскае абмеркаванне, аднак асобныя нормы выклікалі крытыку. Распрацоўшчыкі абяцалі скарэктаваць спрэчныя палажэнні.

Апошнія навіны