BE RU EN

Грыбы з «сюрпрызам» знайшлі ў 19 раёнах Беларусі

  • 21.11.2026, 14:59

Рэкорд месяца па ўтрыманні цэзію належыць узору з-пад Брагіна.

У кастрычніку Гомельскім абласным цэнтрам гігіены, эпідэміялогіі і грамадскага здароўя былі даследаваныя больш за 1600 пробаў ежы і вады. Небяспечныя ўзоры знайшлі ў 19 з 21 раёна вобласці, піша «Точка».

На перавышэнне цэзію-137 было даследавана 67 узораў ежы і 53 пробаў пітной вады з дзяржаўнага сектара. Перавышэнняў там не выяўлена.

Што людзі прыносяць з лесу

Тым часам спецыялісты даследавалі 1527 харчовых пробаў з прыватнага сектара і перавышэнні нарматываў выявілі ў 141 узоры: у 99 узорах свежых грыбоў і прадуктаў іх перапрацоўкі, у 39 узорах сушаных грыбоў, у 2 узорах мяса дзікіх жывёл і ў 1 узоры дзікарослых ягад.

Радыеактыўныя грыбы і не толькі выявілі на тэрыторыі 19 раёнаў вобласці: у Брагінскім, Буда-Кашалёўскім, Веткаўскім, Гомельскім, Добрушскім, Ельскім, Жыткавіцкім, Жлобінскім, Калінкавіцкім, Кармянскім, Лельчыцкім, Лоеўскім, Мазырскім, Нараўлянскім, Петрыкаўскім, Рэчыцкім, Рагачоўскім, Светлагорскім і Хойніцкім.

Рэкард месяца па ўтрыманні цэзію ў свежых грыбах належыць узору з Брагінскага раёна. Было зафіксавана 18 555 Бк/кг пры нарматыве 500 Бк/кг (перавышэнне — у 37 разоў).

У сушаных грыбах пры нарматыве 2500 Бк/кг былі знойдзены ўзоры з паказчыкам 76571 Бк/кг у Нараўлянскім раёне.

Мінімальныя перавышэнні цэзію зафіксавалі ў пробах мяса дзікіх жывёл: ад 314 Бк/кг у Нараўлянскім раёне да 434 Бк/кг у Калінкавіцкім пры нарматыве 300 Бк/кг.

Пры нарматыве 160 Бк/кг утрыманне цэзію-137 у пробе дзікарослых ягад склала 187 Бк/кг у Лельчыцкім раёне.

Акрамя таго, былі ўзяты 106 пробаў ежы і 9 пробаў вады на ўтрыманне стронцыю-90. Перавышэнняў не выяўлена.

Дзе праверыць свой ураджай

Жыхары Гомельшчыны могуць бясплатна здаць сабраныя грыбы і ягады на аналіз па ўтрыманні радыенуклідаў. Для гэтага дастаткова звярнуцца ў тэрытарыяльны цэнтр гігіены і эпідэміялогіі.

Там правяраюць не толькі грыбы і ягады. На даследаванне таксама можна прынесці мяса дзікіх жывёл або рыбу, злоўленую ў мясцовых вадаёмах.

Для аналізу спатрэбіцца мінімум 0,5 л прадукта. Калі гэта сушаныя грыбы, хопіць 100 г. Пра вынікі спецыялісты паведамяць вусна ў дзень звароту.

Апошнія навіны