Мінчук здаваў у арэнду кватэры, якіх у яго не было

• 13.04.2026, 10:23

«Кватарант» даў яму ўрок.

26-гадовы жыхар сталіцы вырашыў хутка зарабіць па адпрацаванай іншымі махлярамі схеме. Ён размяшчаў аб’явы пра арэнду кватэр, якіх у яго не было. Падрабязнасці паведамілі агенцтву «Минск-Новости».

У жніўні 2025 года абвінавачаны размясціў у інтэрнэце аб’яву пра здачу ў арэнду кватэры на вуліцы Усходняй. Дзе менавіта ён узяў інфармацыю і фота, невядома, але факт у тым, што жыллё яму не належала. Адгукнуліся трое ахвотных, якія пералічылі яму на картку перадаплату. Пасля гэтага ён перастаў выходзіць на сувязь.

Праз некалькі дзён аналагічным спосабам зламыснік падмануў яшчэ адну дзяўчыну — на гэты раз ён «здаваў» чужую жылую плошчу на вуліцы Каліноўскага.

Зразумеўшы, што стаў ахвярай аферыста, адзін з патэнцыйных кватарантаў звярнуўся ў міліцыю. У дачыненні да мінчука ўзбудзілі крымінальную справу па факце махлярства. Знайшлі і іншых пацярпелых, якія ў суме страцілі 420 рублёў.

Прамышляў махляр і іншымі справамі. У верасні каля Камароўскага рынку ён купіў у кагосьці падроблены рэцэпт на лекі, пасля чаго тройчы ў розных аптэках набываў лекі па ім. Адна з фармацэўтак засумнявалася ў рэцэпце і патэлефанавала ў міліцыю.

— Абвінавачаны жанаты, афіцыйна нідзе не працуе, раней да крымінальнай адказнасці не прыцягваўся, — пракаментаваў намеснік пракурора Фрунзенскага раёна Ігар Жыбуль. — Яму прад’яўлена абвінавачанне ў здзяйсненні злачынстваў, прадугледжаных ч. 1 арт. 209 КК («Махлярства») і ч. 1 арт. 380 КК («Падробка, выраб, выкарыстанне альбо збыт падробленых дакументаў, штампаў, пячатак, бланкаў»). Віну грамадзянін поўнасцю прызнаў, прычыненую пацярпелым шкоду не кампенсаваў. У сувязі з тым, што ён схаваўся ад следства, у дачыненні да яго прымянілі меру стрымання ў выглядзе заключэння пад варту. Згодна з высновамі эксперта, абвінавачаны мае патрэбу ў прымусовым лячэнні ад хранічнага алкагалізму і наркаманіі.