Папа Рымскі адказаў Трампу

• 13.04.2026, 12:50

Леў XIV заявіў, што не будзе падладжвацца пад палітычную кан'юнктуру.

Кіраўнік Ватыкана Леў XIV адрэагаваў на крытыку прэзідэнта ЗША Дональда Трампа. Пантыфік падкрэсліў, што мае намер і далей даносіць свае перакананні, нягледзячы на незадаволенасць Вашынгтона. Пра гэта паведамляе CNN.

Пасля таго як Трамп абрынуўся на пантыфіка з рэзкімі заўвагамі, Папа Леў заявіў, што такія выпады яго не палохаюць.

«Я не маю намеру ўцягвацца ў палеміку. Мае словы не з'яўляюцца асабістай атакай. Я толькі заклікаю чалавецтва будаваць масты дзеля міру і згоды, імкнучыся пазбягаць войнаў усімі даступнымі спосабамі», — адзначыў кіраўнік царквы.

Пантыфік таксама дадаў, што яго місія — прапаведаваць Евангелле, і ён не мае намеру падладжвацца пад палітычную кан'юнктуру Белага дома. Паводле слоў Папы, царква не займаецца знешняй палітыкай у тым прагматычным ключы, у якім яе ўспрымае Трамп.

«Я не баюся адміністрацыі Трампа. Я тут дзеля таго, каб агучваць ісціны, якія важныя для царквы. Мы — не палітыкі», — падсумаваў Леў XIV у размове з журналістамі.

Нагадаем, што хваля абмеркаванняў пачалася пасля нядзельнай заявы Дональда Трампа, які публічна прызнаў, што «не з'яўляецца фанатам» цяперашняга Папы.