Адзінараса, які больш за 20 гадоў працаваў у Дзярждуме і Савеце Федэрацыі, прысудзілі да 10 гадоў
- 13.04.2026, 18:52
За заказнае забойства.
Цвярскі раённы суд Масквы прысудзіў да 10 гадоў калоніі строгага рэжыму былога сенатара ад Тульскай вобласці, адзінараса Дзмітрыя Савельева, які заказаў забойства свайго дзелавога партнёра. Яго таксама пазбавілі дзяржаўных узнагарод. У сакавіку прысяжныя прызналі Савельева вінаватым. Следства ўстанавіла, што ў 2023 годзе сенатар даручыў свайму знаёмаму Юрыю Нефедаву арганізаваць забойства бізнесмена Сяргея Іонава, з якім ён разам кіраваў «Оптомониторингам» — пастаўшчыком сістэм назірання для газавых і нафтавых прадпрыемстваў, перадае The Moscow Times.
Тады Іонаў атрымаў тэрмін за растрату камандзіровачных — справу ініцыяваў Савельеў пасля адмовы партнёра перадаць долю ў кампаніі. Паводле даных следства, пасля сенатар вырашыў забіць былога кампаньёна. У якасці выканаўцы падбралі супрацоўніка ФСІН, прапанаваўшы яму $100 тысяч. Той распавёў пра ўсё ФСБ, якая інсцэніравала забойства, каб злавіць заказчыка на гарачым пры аплаце «паслугі». Савельева затрымалі 2 жніўня 2024 года проста на пасяджэнні Савета Федэрацыі. Ён працаваў у верхняй палаце парламента з 2016 года, да гэтага больш за 15 гадоў абіраўся ў Дзярждуму, а яшчэ раней быў прэзідэнтам «Транснефці».
Віну Савельеў не прызнаў. Ягоны саўдзельнік Юрый Нефедаў прыняў супрацьлеглае рашэнне і атрымаў 4 гады калоніі. Да затрымання Савельеў паспеў перадаць сваім сынам маёнтак пад Лонданам коштам 12,5 млн фунтаў стэрлінгаў (1,3 млрд рублёў), які ён не дэклараваў, і бізнес-актывы ў Расіі з сумарнай выручкай каля 1 млрд рублёў за 2023 год.
На той момант 23-гадовы Данііл Савельеў стаў уласнікам ніжагародскага гарэлачнага завода «Стандартъ» і паловы кампаніі «Аван-Био», якая выпускае прэпараты для паляпшэння стрававання. Яшчэ 50% належаць дачцэ дэпутаткі Дзярждумы Валянціны Церашковай Алене. Таксама Даніілу адышоў гандлёвы цэнтр на Алтуф'еўскім шасэ ў Маскве і ювелірны завод «Статус Капітал», якім малады чалавек валодае разам з маці Вольгай.
Двое малодшых сыноў сенатара, Савва і Дзяніс, атрымалі яго ніжагародскія актывы: рэстаран «Ока», аднайменную сетку фітнес-цэнтраў і забаўляльны комплекс Capital Club. Акрамя гэтага, у іх уласнасці апынулася кампанія «Оптомониторинг».