Мікалай Статкевіч расказаў, што дагэтуль лічыцца зняволеным
- 15.04.2026, 20:50
Хоць рэжым заяўляў пра памілаванне.
Лідар апазіцыі, вызвалены палітвязень Мікалай Статкевіч паведаміў у сваім тэлеграм-канале, што ў базе МУС ён усё яшчэ лічыцца зняволеным ІК-13 у Глыбокім.
Пра гэта палітык даведаўся, калі вырашыў аднавіць пенсію.
«Гісторыя з маім пашпартам, знойдзеным у СІЗА-1, атрымала працяг. Высветлілася, што аднавіць пенсію толькі паводле яго нельга — патрэбная яшчэ даведка аб вызваленні. Тым больш што, як мне паведамілі, згодна з базай дадзеных МУС я дагэтуль лічуся зняволеным у ІК-13 у Глыбокім. Давялося зноў ехаць у тое СІЗА-1 па даведку аб вызваленні. Але там намеснік начальніка па аператыўнай рабоце паведаміў мне, што такую даведку мне даць не могуць, бо яны мяне «не вызвалялі», а я быў вывезены з турэмнай бальніцы пры СІЗА «планавым канвоем». А пашпарт і рэчы мне аддалі, таму што яны «належаць мне», — расказаў апазіцыйны лідар.
Ён узгадаў словы прэс-сакратаркі Наталлі Эйсмант пра ягонае вызваленне па памілаванні.
«Успамінаю, як адна афіцыйная дама па тэлевізары сцвярджала, што мяне нібыта вызвалілі паводле «ўказу аб памілаванні» яшчэ ў верасні мінулага года. Але хто той указ бачыў… А дамы бываюць часам такімі зменлівымі. Цяпер я канчаткова заблытаўся ў сваім сённяшнім юрыдычным статусе і месцазнаходжанні», — піша Статкевіч.
Нагадаем, увечары 19 лютага стала вядома, што на волю выйшаў палітвязень Мікалай Статкевіч. У апазіцыйнага лідара, як паведаміла ягоная жонка Марына Адамовіч, быў інсульт, цяпер ён аднаўляецца.
11 верасня рэжым Лукашэнкі вызваліў і выдворыў з краіны 52 зняволеных. Мікалай Статкевіч стаў адзіным з гэтай групы, хто не перасёк мяжу Беларусі і Літвы. Некаторы час палітыка можна было бачыць на здымках з камер на мяжы, пасля яго ў невядомым напрамку вывезлі людзі ў масках. Доўгі час было невядома, дзе ён знаходзіцца.
У 2021 годзе Мікалая Статкевіча прысудзілі да 14 гадоў калоніі асаблівага рэжыму за арганізацыю «масавых беспарадкаў».
З пачатку ліпеня 2022 года, з таго часу, як Мікалай Статкевіч пачаў адбываць пакаранне ў Глыбоцкай калоніі, лідара беларускай апазіцыі ўтрымлівалі ў максімальна жорсткіх умовах: трымалі ў адзіночнай камеры ў небяспечных для здароўя ўмовах. Стала вядома, што ў зняволенні Мікалай Статкевіч некалькі разоў перахварэў на COVID-19.