ЗША вырашылі не падаўжаць паслабленні для расійскай нафты

• 15.04.2026, 21:34

Мінэнерга краіны таксама лічыць непатрэбным далейшае вызваленне рэсурсаў з рэзерваў.

ЗША не будуць падаўжаць ліцэнзіі, якія часова дазвалялі закупляць расійскую і іранскую нафту без увядзення другасных абмежаванняў, — заявіў амерыканскі міністр фінансаў Скот Бэсент на брыфінгу ў Белым доме. Трансляцыя ідзе на YouTube.

Сёння ўвечары ў падаўжэнні мер усумніўся і міністр энергетыкі ЗША Крыс Райт. «Гэта было шырокае паслабленне. Не думаю, што вы ўбачыце яго падаўжэнне», — сказаў Райт.

Кіраўнік Мінэнерга таксама заявіў, што лічыць непатрэбным далейшае вызваленне стратэгічных нафтавых рэзерваў, і адзначыў рост здабычы ў Венесуэле, дзе здабыча павялічылася да 1,2 млн барэляў у суткі.

Часовая ліцэнзія Мінфіна ЗША, якая дазваляла праводзіць аперацыі з расійскай нафтай і нафтапрадуктамі, пагружанымі на суда да 12 сакавіка, дзейнічала да 11 красавіка і не была падоўжаная. Як адзначае Politico, такім чынам, дзеянне санкцый супраць расійскай нафты было адноўлена. Паводле звестак агенцтва Reuters, адміністрацыя ЗША таксама не будзе падаўжаць аналагічнае 30-дзённае выключэнне для іранскай нафты, тэрмін дзеяння якога заканчваецца 19 красавіка.